Petropavlda 3 muǵalimnen koronavırýs anyqtalǵan mektep qashyqtan oqýǵa kóshirildi
PETROPAVL. QazAqparat – Petropavlda M.Aıtqojın atyndaǵy № 1-shi orta mektep 5 oqýshy jáne 3 muǵalimniń koronavırýsty juqtyrýyna baılanysty qashyqtan oqýǵa kóshirildi, dep habarlaıdy QazAqparat tilshisi.
Petropavldaǵy M.Aıtqojın atyndaǵy № 1-shi orta mektepte koronavırýs juqtyrǵan alǵashqy balany medıtsınalyq qyzmetker oqýshylardy tekserip jatyp anyqtaǵan. 9-synyp oqýshysynda tumaý belgisi bolǵan. Birden ata-anasyna habarlap, emdeý mekemesine jónelgen.
Kóktemgi demalystan keıin oqýshylar eki kún oqyp, aýyra bastaǵan. Osylaısha mekteptiń eki 9-synybynda, 8-shi jáne 1-shi synyptarynda vırýs juqtyrǵan balalar anyqtaldy. Osy synyptarda sabaq bergen 3 muǵalimniń de aýyrǵany belgili boldy.
«Balalar úılerinen, otbasynda juqtyryp kelgen. Olarda negizinen aýrý belgileri bolǵan joq. Qaýipti vırýs ári qaraı taralmaýy úshin sanıtarııalyq dárigerler osyndaı sheshim shyǵardy. Eki aptaǵa mektep karantınge jabyldy, biraq biz sabaqty qashyqtan jalǵastyramyz», - deıdi mektep dırektory Alekseı Kýrlenıa.
Bıyl jyl basynan SQO-da 419 oqýshyda koronavırýs tirkeldi. Olardyń 130-y qashyqtan oqý barysynda otbasynda juqtyrǵan. Aýyrǵan muǵalimder sany – 136-y, olardyń 95-i shtattyq rejımde sabaq bergen.
