Petropavlda 27 kópqabatty turǵyn úı salynady

PETROPAVL. QazAqparat – Soltústik Qazaqstan oblysyn keshendi damytý josparyna sáıkes 5 jylda 2,3 mln sharshy metr baspana paıdalanýǵa berilýi tıis, dep habarlaıdy QazAqparat tilshisi.

SQO ákimdiginde ótken ınvestforýmda belgili bolǵandaı, sońǵy 5 jylda bıýdjettik qurylysqa jumsalǵan qarjy 3 ese artqan, 2017 jyly 9 mlrd teńge bólinse, byltyr 29 mlrd teńge ıgerilgen. Bıyl da qurylys qarqyndy júrgizilip jatyr, 401 myń sharshy metr baspana paıdalanýǵa berilýi tıis.

«Petropavldaǵy Jas Órken, Bereke jáne Ýálıhanov kóshesinde kóp qabatty úıler salynady. Renovatsııa baǵdarlamasy aıasynda 2019 jyldan beri jeke sektordaǵy 1700 eski, apatty jaǵdaıda turǵan úıler súrildi. Bıyl 117-si buzylady.

Kopaı shaǵyn aýdanyn jańǵyrtamyz. Bul jerde keshendi qurylys bastalyp, 27 kóp qabatty úı turǵyzylady. 2800 páter salynyp, 10 myńǵa jýyq adam turmys jaǵdaıyn jaqsartýǵa múmkindik alady», - dedi SQO ákimi Qumar Aqsaqalov.

SQO-da kommertsııalyq baspana qurylysy da qyzǵan. Byltyr 23 úıdiń qurylysy bastalsa, sonyń beseýi qoldanysqa berildi. Bıyl 27 kóp qabatty úı salynyp jatyr, onyń 19-ynda turǵyndar bıyl qonys toıyn toılamaq.

«Jeke turǵyn úı qurylysy da nazardan tys qalmaıdy. Qazirgi ýaqytta «Solnechnyı-2», «ıÝjnyı» shaǵyn aýdandarynda ýchaskelerge sý elektr jelisin tartyp jatyrmyz. Joldar salynady. Nátıjesinde úı salý úshin jer kezeginde turǵandarǵa 3 myń ýchaske beriledi», - dedi Qumar Aqsaqalov.

Petropavl qalasy boıynsha 11 800-den astam adam jeke turǵyn úı salýǵa jer ýchaskesine kezekte tur. Aralarynda 2003 jyldan beri turǵandar da bar.