Petropavlda 25 jyl jazasyn ótegen qylmysker áıelge shabýyl jasap, taǵy 9 jylǵa sottaldy
PETROPAVL. KAZINFORM — Petropavlda on shaqty adamdy óltirip, sol úshin 25 jyl jazasyn ótegen retsıdıvıst eki jyl ótpeı qaıta áıelge shabýyl jasaǵan.
Oqıǵa bıyl 19 maýsymda Petropavl mańynda bolǵan edi. Sol kúni Krıchınevskıı jolda velosıpedpen kele jatqan beıtanys áıeldi baıqap, ony toqtatqan.
Petropavl qalalyq sotynyń málimetinshe, sottalýshy áıelge joǵalǵan sıyryn izdep júrgenin aıtqan. Keıin ony moınynan qylǵyndyryp, jerge qulatqan. Sondaı-aq pyshaq kórsetip, óltiremin dep qorqytqan jáne ormanǵa birge barýdy talap etken.
Alaıda qylmyskerge oıyn júzege asyrýǵa jolda kele jatqan bógde er adam kedergi keltirgen. Kórip qalmasyn dep qylmystyq áreketin toqtatqan kezde jábirlenýshi osy sátti paıdalanyp, oqıǵa ornynan qashqan.
Sottalýshynyń kinási jábirlenýshiniń, kýálardyń jaýaptarymen jáne jazbasha dáleldemelermen rastaldy.
Memlekettik aıyptaýshy sottalýshyny 9 jylǵa bas bostandyǵynan aıyrýdy surady. Biraq er adam óz kinásin moıyndamady. Al onyń qorǵaýshysy sottalýshynyń áreketinde qylmystyq quqyq buzýshylyq quramy joq ekenin aıtyp, ony aqtaýdy surady.
QR Qylmystyq kodeksiniń 121-baby 2-bóligi boıynsha mundaı qylmys úshin 9 jyldan 12 jylǵa deıin bas bostandyǵynan aıyrý jazasy qarastyrylǵan.
Nátıjesinde sot qylmyskerdi 9 jylǵa bas bostandyǵynan aıyrdy. Ol jazasyn qylmystyq-atqarý júıesiniń barynsha joǵary qaýipsizdik mekemesinde óteıtin bolady.
Sot úkimi ázirge zańdy kúshine engen joq.
Sottalǵan Valerıı Krıchınevskıı buǵan deıin asa aýyr qylmystar: qaraqshylyq, óltirý qaterin tóndire otyryp, erekshe qatygezdikpen zorlaý, seksýaldyq zorlyq-zombylyq áreketti kámeletke tolmaǵan balaǵa qatysty jasaǵany úshin sottalǵan. Ol 1999 jylǵy 28 jeltoqsanda Soltústik Qazaqstan oblystyq sotynyń úkimimen birneshe aýyr jáne asa aýyr qylmys jasaǵany úshin 25 jylǵa bas bostandyǵynan aıyrylǵan. Jazasyn tolyq ótegen er adam 2024 jylǵy 12 qańtarda № 51 mekemesinen bosatylǵan. Keıin Aıyrtaý aýdandyq sotynyń 2023 jylǵy 27 qarashadaǵy qaýlysyna sáıkes oǵan sottylyǵy joıylǵanǵa deıin 8 jyl merzimge ákimshilik qadaǵalaý belgilengen. Biraq bostandyqtaǵy ómiri uzaqqa sozylmady.
