Petropavlda 22 jastaǵy jumysshyny tok soǵyp, mert boldy
PETROPAVL. KAZINFORM — Petropavldaǵy kásiporyndardyń birinde kóktemgi sý tasqynyna daıyndyq barysynda jumysshy mert boldy.
Soltústik Qazaqstan oblysy boıynsha memlekettik eńbek ınspektsııasynyń málimetinshe, oqıǵa búgin bolǵan. Marqum — 2004 jyly týǵan jigit. Ol Soltústik Qazaqstan elektr jelisin taratý kompanııasynda qosalqy stantsııa jabdyqtaryn jóndeý jónindegi elektroslesar bolyp jumys istegen.
Aldyn ala málimet boıynsha, jumysshy qosalqy stantsııada kóktemgi sý tasqynyna daıyndyq jumystaryn júrgizý kezinde tokqa túsken. Jumys arnaıy ruqsatpen atqarylǵan.
Ókinishke qaraı, ol alǵan jaraqaty saldarynan oqıǵa ornynda kóz jumdy.
Qazirgi ýaqytta bul jaǵdaıǵa baılanysty tıisti organdar tekserý jumystaryn júrgizip jatyr. Oqıǵanyń naqty sebepteri men mán-jaıy anyqtalatyn bolady.
Soltústik Qazaqstan elektr jelisin taratý kompanııasy basshylyǵy kóz jumǵan jumysshynyń otbasyna barlyq qajetti kómek kórsetiletindigin aıtty.
— Josparly jumystardy jasaý kezinde bizdiń áriptesimizdi joǵary kerneýli elektr togy soqty. Medıtsınalyq kómek jyldam kórsetilgenine qaramastan áriptesimizdiń ómirin saqtaı almadyq. Kompanııa ujymy áriptesimizdiń týǵan-týysqandaryna kóńil aıtady. Otbasyna barlyq qajet bolǵan kómekti kórsetemiz, — dedi kompaınıa dırektory Aleksandr Chekýlaev.
Buǵan deıin SQO-da qus fabrıkasynda jaraqat alǵan er adamnyń qolyna ampýtatsııa jasalǵanyn jazǵan edik.
