Petropavlda 21 mlrd teńgege tórt zamanaýı mekteptiń qurylysy josparlanǵan

PETROPAVL. QazAqparat – Petropavlda «Jaıly mektep» baǵdarlamasy aıasynda aldaǵy úsh jylda 4 mektep salynbaq. Onyń ekeýiniń qurylysy bıyl bastalady, dep habarlaıdy QazAqparat tilshisi.

Petropavl ákimi Rýslan Ańbaevtyń aıtýynsha, «Jaıly mektep» baǵdarlamasy aıasynda salynatyn 4 mektep jalpy 3300 orynǵa arnalǵan.

«Kopaı» men «Orman» shaǵyn aýdandarynda 600 oryndyq, «Jas Órkende» - 900, al «Berekede» 1200 balaǵa shaqtalmaq.

Osy maqsatqa 21 mlrd teńge jumsalmaq. Bıyl 2 mekteptiń qurylysy bastalady.

«Osy jyly oblys ortalyǵyndaǵy № 17 mektep pen 2 balabaqshada kúrdeli jóndeý jumystary júrgiziledi. Oǵan 649 mln teńge bólinedi. Taǵy jeti mektepte jylytý jáne káriz júıesi jónge keltirilmek, bes mektep pen eki balabaqshada shatyr aýystyrylady, eki mekteptiń kireberisi, № 26 mektep-balabaqshanyń sport zaly jónge keltirilip, Birinshi It-lıtseıdiń terezeleri jáne № 10 mekteptiń evakýatsııalyq satysy aýystyrylmaq. Bıyl bilim salasynyń bıýdjeti - 25,6 mlrd teńge. Qosymsha oblystyq qazynadan 83 mln teńge bólindi. Bul qarajatqa memlekettik balabaqshalar jaraqtandyrylmaq», - deıdi qala ákimi.

Jalpy Petropavlda qazirgi ýaqytta úsh shaǵyn aýdanda qurylys qyzǵan.

Qurylys-montajdaý jumystary 34 alańda júrgizilip jatyr, onyń 14-i – bıýdjet esebinen salynyp jatqan baspana, jalpy aýmaǵy 110,1 myń sharshy metr.

Qalǵan 20-sy – kommertsııalyq úıler, onyń da jalpy aýdany sol shamalas.