Petropavlda 200-den astam ofıtser túlep ushty
PETROPAVL. QazAqparat - Qazaqstan Respýblıkasy Ulttyq gvardııasy Áskerı ınstıtýtynyń 209 túlegi áskerı oqý ornyn aıaqtaý jónindegi dıplomdar men «leıtenant» shenderin aldy, dep habarlaıdy «QazAqparat» HAA tilshisi oqý ornynyń baspasóz qyzmetine silteme jasap.
«Búgin biz ınstıtýt ofıtserleriniń 17-inshi, sondaı-aq halyqaralyq shyǵarylymnyń besinshi legin shyǵaryp salyp otyrmyz. Qazaqstandyq túlekterden bólek, Tájikstannyń - toǵyz, Qyrǵystan Respýblıkasynyń bes ókili dıplomdaryn aldy. Barlyqtaryńyz Ulttyq gvardııa áskeriniń qataryn, sondaı-aq óz memleketterińizdegi qarýly kúshter qataryn tolyqtyryp, mindetterińizdi laıyqty atqarady dep senemin», - dedi QR Ulttyq gvardııasy Bas qolbasshysynyń orynbasary, memlekettik attestattaý komıssııasynyń tóraǵasy general-maıor Albert Mátkárimov.
Sonymen qatar, 1-oqý batalony túlekterine ofıtserlik shender tabystaldy. Qalyptasqan dástúr boıynsha baýyrlas úsh respýblıkanyń memlekettik týlary kóterildi.
Áskerı ınstıtýt 20 jyl ishinde on jetinshi tolqyndy shyǵaryp salyp, 3100 ofıtserge joldama berdi, olardyń 252-si ınstıtýtty úzdik bitirip, 45 túlekke «Áskerı oqý ornyn úzdik bitirgeni úshin» tósbelgileri tabystaldy.
