Petropavlda 2 aı buryn eki boıjetkendi qaǵyp ketken kúdikti qamaýǵa alyndy
PETROPAVL. QazAqparat - Eki boıjetkendi qaǵyp ketti degen kúdikpen Ilıa Starýhın Petropavldaǵy ýaqytsha ustaý oqshaýlaǵyshyna qamaldy, dep habarlaıdy QazAqparat.
Soltústik Qazaqstan oblystyq polıtsııa departamenti baspasóz qyzmetiniń aqparaty boıynsha, 27 jastaǵy jigitke budan buryn Petropavl ortalyǵynda «túngi klýbtyń aldynda adam qaqty» degen kúdikpen memleketaralyq izdeý salynǵan edi.
«Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» jáne «Jol-kólik oqıǵasy bolǵan jerdi qaldyryp ketý» baptary boıynsha sotqa deıingi tergeý júrip jatyr. Qajetti saraptamalar taǵaıyndaldy. Materıaldardy jan-jaqty zertteý, tergep-tekserý áreketteri júrgizilgennen keıin qylmystyq is óndirispen aıaqtalady», - dep túsindirdi baspasóz qyzmetinen.
Qaıǵyly oqıǵa 15 qyrkúıekte bolǵan edi. «Leksýs» júrgizýshisi eki boıjetkendi qaǵyp ketip, olardyń biri birneshe kún ótken soń esin jımastan kóz jumǵan bolatyn. Júrgizýshiniń oqıǵa ornynan izin sýytyp, elden ketip qalǵany habarlanǵan edi.
