Petropavlda 2,7 mlrd teńgege bóget salynýda
PETROPAVL. QazAqparat - Petropavldaǵy Kojzavod aýylynda sýdan qorǵaıtyn bóget salynyp jatyr, dep habarlaıdy «QazAqparat» HAA tilshisi. Petropavl ákimdigi baspasóz qyzmetiniń málimetinshe, bul maqsatqa respýblıkalyq bıýdjetten 2,7 mlrd teńge bólingen.
«Qaıta salý jumystary barysynda uzyndyǵy 3,1 km sýdan qorǵaıtyn bóget salynatyn bolady. Qazirgi ýaqytta qurylystyń 70% jumysy oryndaldy», - dep málim etti baspasóz qyzmetinen.
Bóget qurylysy byltyrǵy jyldyń tamyz aıynda bastalǵan. Ol kezde uzyndyǵy - 883 metr, bıiktigi 3,5 metr qorshaý salynǵan bolatyn. Bul bóget Kojzavod aýylyndaǵy úılerdiń basym bóligin Esil ózeniniń tasqynynan aman alyp qalǵan edi. Alaıda, bıylǵy jylǵy qatty tasqyn salynǵan qorshaýdyń qala mańyn qorǵaýǵa dármensiz ekenin dáleldedi. Esil ózeni bıylǵy kóktemde jaǵasynan 9 metrge deıin jaıylyp, sý deńgeıiniń joǵarylaýy 9 metrge deıin jetti. Kojzavod qalanyń eń kóp zardap shekken aýdandarynyń biri. Munda 100-den astam úıdi sý basyp qaldy.
Qurylys alańyna sońǵy saparynda SQO ákimi tótenshe jaǵdaıdyń qaıtalanbaýy tıistigine basa nazar aýdaryp, bóget bekitilgen merzimde aıaqtalatynyna sendirdi.
«Sapaly bóget sýdyń ótýine jol bermeı, eski arnamen aǵyp ketýge tıis. Sol sebepti Kojzavod aýylyna kelesi kóktemde qaýip tónbeıdi dep senemiz», - dedi Qumar Aqsaqalov.
