Petropavlda 19 jastaǵy boıjetken órtengen úıde qalyp qoıǵan er adamdy qutqardy

PETROPAVL. QazAqparat – Petropavlda 1 qańtar kúni keshke turǵyn úı órtendi. Onyń ıesi órtte qaza tapty, úıdegi ekinshi adamǵa 19 jastaǵy qyz syrtqa shyǵýǵa kómektesti, dep habarlaıdy QazAqparat tilshisi.

Tótenshe jaǵdaılar departamenti baspasóz qyzmetiniń málimetinshe, Jumysshylar aýylynda jekemenshik baspana órtengen.

Jalyndy tolyǵymen sóndirýge bir saǵat ýaqyt ketti. Qutqarýshylar oqıǵa ornynan 33 jastaǵy úı ıesiniń denesin tapty.

Órt saldarynan taǵy bir adam zardap shekkeni belgili boldy.

Petropavldyq 32 jastaǵy er adam qoly men basynan jeńil kúıik alǵan, aýrýhanaǵa jatqyzýdyń qajeti bolmady.

Ony órtten sol kóshede turatyn 19 jastaǵy Marııa Sımonova aman alyp qaldy.

Úıden shyqqan tútindi birinshi baıqaǵan ol janyp jatqan úıge qaraı júgirgen.

Esikti ashqanda, syrtqa shyǵý úshin esikke qaraı eńbektep jatqan adamdy kórdi. Boıjetken oǵan kómektesip, órt sóndirýshilerdi shaqyrdy.

Baspasóz qyzmeti departamentte qyzdy marapattaý máselesin qarastyryp, onyń batyl áreketi týraly aqparatty kolledj basshylyǵyna mindetti túrde jetkizetinine ýáde berdi.