Petropavlda 19 myńǵa jýyq adam jer ýchaskesine kezekte tur

PETROPAVL. QazAqparat – Petropavlda jeke turǵyn úı salý úshin jer ýchaskesine kezekke turǵandar sany kúrt artty. Byltyr 10 sotyq jerden úmittilerdiń sany jyldyń basynda 12 myńǵa jýyq bolsa, bıyl birden 7 myńǵa artqan, dep habarlaıdy QazAqparat tilshisi.

Petropavl qalalyq ákimdiginiń málimetinshe, qazir 18 669 adam jeke turǵyn úı salý úshin jer ýchaskesiniń kezeginde tur. Buryn bul aqparat ákimdiktiń resmı saıtynda qoljetimdi bolsa, bıyldan bastap kezektegi ornyńdy kórý úshin elektrondy tsıfrlyq qoltańba qajet.

«Jeke turǵyn úı salýǵa qajet ýchaskelerdi berý úshin «Solnechnyı-2» jáne «ıÝjnyı» shaǵyn aýdandarynda ınjenerlik ınfraqurylymy tartylyp jatyr. Osy kúni «Solnechnyı-2» kentinde 68,2 km sý jelisi jáne 102,5 elektr jelisi tartyldy, 60 km jýyq jol salyndy.

«ıÝjnyı» shaǵyn aýdanynda 43,5 km sý jelisi tartylyp, 34,3 km jol salyndy. Qazirgi ýaqytta elektr baǵandary ornatylyp jatyr. Bul aýdanda 32 km jeli tartylyp, 12 elektr stantsııasy ornatylady. Joba keler jyly aıaqtalady», - deıdi Serik Muhamedıev.

Jospar boıynsha «Solnechnyı-2» kentinde 2 myń, «ıÝjnyı» shaǵyn aýdanynda 1 myń ýchaske berilmek. Kezek óte baıaý jyljyǵanymen tez ósip keledi. Máselen, sońǵy eki jylda nebári 175 adam ǵana jer ýchaskesine qol jetkizgen, al bir jylda kezek shamamen 7 myń adamǵa ulǵaıǵan.

Jalpy Petropavlda qurylys qarqyn alǵan, negizinen «Jas órken», «Ortalyq», «Bereke» jáne «Kopaı» shaǵyn aýdandarynda kópqabatty úıler salynyp jatyr. Jaqynda bıýdjettik 6 úı paıdalanýǵa beriledi.

«Oblys ortalyǵynda kommertsııalyq baspanaǵa da suranys bar. Jekemenshik kompanııalar bıyl 29 kópqabatty úıdiń qurylysyn josparlasa, sonyń segizi paıdalanýǵa berildi.

Jalpy bıyl 20 kópqabatty – 6 bıýdjettik jáne 14 kommertsııalyq úıdiń qurylysy aıaqtalady. Nátıjesinde 2 myńnan astam otbasy baspanaly bolady», - deıdi Petropavl ákimi Serik Muhamedıev.