Petropavlda 18 jastaǵy boıjetken esirtkimen ustaldy
Soltústik Qazaqstan oblystyq Polıtsııa departamenti baspasóz qyzmetiniń málimetinshe, petropavldyq boıjetkennen polıtseıler 40 grammǵa jýyq mefedron sıntetıkalyq esirtki tárkiledi. Áseri kúshti ári asa qaýipti esirtkiniń bul túri Soltústik Qazaqstan oblysynda alǵash ret anyqtalyp otyr.
«Sotqa deıingi tergep-tekserý barysynda jedel is-sharalar, onyń ishinde kúdiktiniń turǵylyqty jeri boıynsha tintý júrgizildi. Páterde esirtkige uqsas zat salynǵan túıinshek tabyldy. Júrgizilgen sot-hımııalyq saraptama zattyń mefedron ekenin rastady», - dedi SQO Polıtsııa departamenti Esirtki qylmysyna qarsy is-qımyl basqarmasynyń bastyǵy Jandos Basybaev.
Sondaı-aq, polıtseıler páterden býyp-túıetin materıaldardy, noýtbýktardy, tarazyny jáne basqa da esirtki kásibin rastaıtyn zattardy tapty.
Tártip saqshylarynyń aıtýynsha, sotqa deıingi tergeý materıaldarynan kúdiktiniń birneshe aı boıy ınternet-dúken arqyly esirtki satyp alyp, asa qaýipti zatty saýdalaǵany anyqtalǵan. Qazirgi ýaqytta sot saraptamasy taǵaıyndaldy.