Petropavlda 17 jastaǵy qyz 12 qabattan qulap, mert boldy
PETROPAVL. QazAqparat – Petropavlda 17 jastaǵy boıjetken kóp qabatty úıdiń 12 qabatynan qulap mert boldy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, oqys oqıǵa Petropavlda 30 mamyr saǵat tańǵy 5.00 shamasynda bolǵan. Polıtsııaǵa oblys ortalyǵyndaǵy Jambyl kóshesi boıyndaǵy úıdiń 12 qabatynan qyzdyń qulaǵany týraly habarlama kelip tústi. 17 jasar boıjetken oqıǵa ornynda qaza tapty.
«Petropavlda 17 jastaǵy qala turǵynynyń sýıtsıd jasaý faktisi boıynsha sotqa deıingi tergeý bastaldy. Qazirgi ýaqytta atalǵan fakti boıynsha QR QK 105-baby «Ózin ózi óltirýge deıin jetkizý» boıynsha sotqa deıingi tergep-tekserýlerdiń biryńǵaı tizilimine engizildi. Saraptamalar taǵaıyndaldy, bolǵan oqıǵanyń mán-jaıy sotqa deıingi tergeý aıasynda anyqtalatyn bolady», - delingen vedomstvonyń baspasóz qyzmeti taratqan habarlamada.
Buǵan deıin Esil aýdany Pokrovka eldi mekeniniń turǵynyn qutqarýshylar izdep jatqanyn aıtqan edik. Tórt kúnnen beri tabylmaı jatqan er adam Esil ózenine batyp ketýi múmkin. Aldyn ala aqparat boıynsha, ol qaıyqpen ózenge shyǵyp, keıin qulap ketken.
Al «Chelıabi-Novosibir» avtojolynyń 498-shi shaqyrymynda, Mamlıýt aýdanynyń Pokrovka aýyly mańynda jol-kólik oqıǵasy bolyp, bir adam qaza tapty. Reseılik 50 jastaǵy azamattyń «Mitsubishi Canter» kóligine bir baǵytta kele jatqan «Honda» skýteri soǵylǵan. Skýter júrgizýshisi – aýdan ortalyǵy Mamlıýtkanyń 38 jastaǵy turǵyny alǵan jaraqattarynan oqıǵa ornynda qaza tapty.
