Petropavlda 17 jasar bozbala maskúnem anasynyń kesirinen úıinen qashqan
Soltústik Qazaqstan oblysy polıtsııa departamenti baspasóz qyzmetiniń málimetinshe, 27 qazan kúni Petropavl qalalyq polıtsııasyna 17 jasar jasóspirimniń iz-túzsiz joǵalǵany jaıly qalalyq ákimdiktiń bilim bólimi ókilinen aryz túsken. Bozbala úıinde 25 qazannan bastap bolmaǵan. Іzdeýge ıývenaldyq jáne krımınaldyq bólimniń jeke quramy tartyldy. Tártip saqshylary joǵalǵan jasóspirim bolýy múmkin degen jerlerdi, tanystaryn tekserdi. Nátıjesinde 28 qazanda ony M.Jumabaev aýdany polıtsııa bóliminiń jedel qyzmetkerleri tapty.
Bozbalanyń aıtýynsha, ol tabys tabýmen aınalysqan. Anasy ishimdikke qumar jáne jarty jylǵa ata-ana quqyǵy shektelgen eken. Osyǵan baılanysty ol úıine barǵysy kelmegen.
«Jyl basynan oblys ortalyǵynda ıývenaldyq polıtseılerdiń jınaǵan materıaldary boıynsha 18 adam ata-ana quqyǵynan aırylyp, 4-niń quqyǵy shekteldi. Osynyń bárine sebep – spırttik ishimdik ishý, kámeletke tolmaǵan balany tárbıeleý jáne kútip-baǵý boıynsha mindetterdi oryndamaý. Qazirgi ýaqytta Petropavlda 124 qolaısyz otbasy esepte tur. Árqaısysy kámeletke tolmaǵandardyń isteri jónindegi ınspektorlardyń qatań baqylaýynda. Bul jumys jasóspirimderdiń bos ýaqyttary kóp bolatyn kúzgi demalys kezinde kúsheıtildi», - deıdi Petropavl qalalyq polıtsııa basqarmasy ıývenaldyq polıtsııa bóliminiń bastyǵy Elmıra Abýsheva.
Osy kúnderi Petropavlda «Demalys» jedel-profılaktıkalyq is-sharasy ótip jatyr. Polıtseıler kúsheıtilgen rejımde jumys istep, túngi kósheler men kóńil kóterý oryndaryna reıdter júrgizedi. Eki kúnniń ishinde oblys ortalyǵynda jasóspirimder jasaǵan 7 túrli quqyq buzýshylyq anyqtaldy. Negizinen bul kámeletke tolmaǵandardyń zańdy ókildersiz túnde úıden tys bolýy.