Petropavlda 16 jastaǵy jasóspirim anasyn aldap, onyń atyna nesıe resimdegen

Petropavlda 16 jastaǵy jasóspirimniń alaıaqtyqqa qatysy bolýy múmkin. Ol týǵan anasyn aldap, onyń atyna qomaqty somadaǵy nesıe resimdegen, dep habarlaıdy Kazinform.

Soltústik Qazaqstan oblysy polıtsııa departamenti baspasóz qyzmetiniń málimetinshe, jyldyń basynda Petropavl turǵynyna ózi almaǵan iri somadaǵy nesıeni tóleý týraly habarlamalar kele bastaǵan. Áıel dereý polıtsııa basqarmasyna júgingen. Nesıeni onyń atyna kim alýy múmkin ekeni týraly esh boljamy bolmaǵan.

Jedel ýákilder suraý barysynda onyń esine 16 jastaǵy ulynyń ótken jyldyń jeltoqsan aıynda saıttardyń birine tirkelýdi ótingeni esine tústi. Balasy ol saıttan emtıhan suraqtaryna arnalǵan jaýaptardy alamyn dep aıtqan. Jasóspirim eki adam tirkelgen jaǵdaıda jeńildik bolady dep túsindirgen. Tirkelý kezinde áıeldiń foto jáne beıneverıfıkatsııadan ótýi qajet bolǵan. Aldanǵanyn túsinbegen áıel «basty solǵa, ońǵa burý» degen sııaqty talaptardy oryndaǵan.

«Osy protsedýradan keıin jábirlenýshiniń atyna 1 mln 180 myń teńge mólsherinde nesıe resimdelgeni anyqtaldy. Atalǵan fakti QR Qylmystyq kodeksiniń 190-babynyń 2-bóligi «Alaıaqtyq» boıynsha Sotqa deıingi tergep-tekserýlerdiń biryńǵaı tizilimine engizildi. Qazirgi ýaqytta tergeý aıaqtalýǵa jaqyn, tergeýshiler is materıaldaryn sotqa jiberýge daıyndap jatyr», - deıdi SQO PD krımınaldyq polıtsııa basqarmasynyń bastyǵy Ivan Terzıdı.

Polıtseılerdiń aıtýynsha, qarjy uıymdary qashyqtyqtan nesıe alý rásimderin qıyndatqannan beri alaıaqtar basqa adamdardyń bıometrııalyq málimetterin paıdalaný úshin túrli ádisterdi qoldana bastady. Sondyqtan sýretke nemese vıdeoǵa túsý týraly ótinishterge saqtyqpen qaraǵan jón. Jeke málimetterdi eshkimge bermeý qajet.

SQO-da 11 aıdyń ishinde ınternet-alaıaqtyqtyń 716 deregi tirkeldi. Onyń 91-i bógde adamdardyń atyna nesıe resimdeýmen baılanysty.