Petropavlda 150 sportshy qatysqan «Qyzyljar-2019» velosherýi ótti
PETROPAVL. QazAqparat - Petropavlda Aleksandr Vınokýrovtyń syılyǵyna arnalǵan ashyq respýblıkalyq kópkúndik velojarysy aıasynda «Qyzyljar-2019» sporttyq aktsııasy ótti, dep habarlaıdy QazAqparat tilshisi.
SQO Dene shynyqtyrý jáne sport basqarmasy baspasóz qyzmetiniń habarlaýynsha, «Qyzyljar-2019» velosherýine 150-den astam sportshy qatysty. Olardyń ishinde Nur-Sultan qalasynyń 20 komandasy, Almaty qalasynyń, Qazaqstannyń basqa óńirleri men Reseı Federatsııasynyń veloshabandozdary bar.
Olarǵa sport ardagerleri men jastar, Qazaqstan sportynyń sańlaqtary: veloshabandozdar Baqtııar Qojataev pen Aleksandr Nadobenko, bylǵary qolǵap sheberi Janat Jaqııanov qosyldy.
Dástúrli velosherý Petropavlda ekinshi márte uıymdastyryldy. Bul joly velosherýge qatysýshylar K.Sútishev, J.Jabaev, ıA.Gashek jáne Nur-Sultan kóshelerin basyp, 7,5 shaqyrymdy júrip ótti.
SQO-da respýblıkalyq kópkúndik velojarystyń ótkizilýi bekerden emes. Qyzyljar óńirinen álemge tanymal velosportshylar: Aleksandr Vınokýrov, Alekseı Lýtsenko, Artem Zaharovtar shyqqan. Jerlesteri Jandos Bıjigitovty, Baqtııar Qojataevty jáne olardyń izin basyp kele jatqan Natalıa Saıfýtdınovany, Mahabbat Úmitjanovany, Alına Sarqulovany maqtan tutady.
«Qyzyljar-2019» velosherýin ótkizýdegi maqsat - sportty nasıhattaý. Salamatty ómir saltyn ustanýǵa shaqyrý. Velosherý ekinshi jyl qatarynan Aleksandr Vınokýrovtyń syılyǵyna arnalǵan ashyq respýblıkalyq kópkúndik velojarysy aıasynda uıymdastyrylyp otyr. Jyl saıyn oǵan qatysýshylardyń sany artyp keledi», - deıdi SQO Dene shynyqtyrý jáne sport basqarmasynyń basshysy Rýslan Esenalın.
«Qyzyljar-2019» velosherýiniń sońynda barlyq qatysýshylarǵa osy kúnnen estelik retinde medaldar tabystaldy.
