Petropavlda 15 jastaǵy jasóspirim volonterler qataryna qosylyp, kópke úlgi bolyp júr
PETROPAVL. KAZINFORM – Petropavldyń 15 jasar turǵyny Tamır Raıymbekov sý tasqyny bastalǵaly beri damyl tappaı, volonterlerdiń qatarynda júr. Jasóspirimniń eńbegi elenip, jaqynda óńirdiń eń jas eriktisi atandy, marapatqa ıe boldy.
Tamır Raıymbekov Petropavldaǵy №13 mekteptiń 9 synybynda oqıdy. Volonterlikke oıda-joqta kelgen.
«Jeńgem «Assambleıa jastary» jastar uıymynyń belsendisi. Birde ol qaladaǵy jalǵyzilikti ájeıge kómektesip, aýlasyn qardan tazartatyn boldy. Men birge bardym, birneshe adam áp-sátte aýlany tazalap shyqtyq. Maǵan bul jumys unady. Keıin jeńgemnen ájeıge kómektesip júrgen kisiler kimder, olar qaı uıymnan dep suradym. Osylaısha volonterlerdiń qataryna qabyldandym», - deıdi Tamır Raıymbekov.
Keıin jasóspirim taǵy birneshe márte qarttarǵa kómektesýge bardy, janýarlardy qutqarý operatsııasyna da qatysady.
Al Petropavlda sý tasqyny bastalǵanda Tamır basqa volonterlermen birge bógetterdi nyǵaıtýǵa kómektesti, gýmanıtarlyq kómek ákelgen kólikterden júkterdi túsirdi. Qaı jerde kómek kerek boldy – aýyr jumystan qoryqpaıtyn jasóspirim sol jerden tabyldy.
«Alǵashqy kúnderi qıyn boldy. Qaptardy qum-balshyqqa toltyrdyq, keıin ony tasydyq. Turǵyndardy evakýatsııalaýǵa kómektestim. Jumys aýyr bolǵanymen, úıler sýǵa ketip jatqanda úıde jata almadym. Sý tasqyny aıaqtalǵanymen, endi onyń saldarymen kúresý kerek. Sondyqtan da senbilikterge shyǵyp, qalany tazartýǵa at salysyp jatyrmyn», - deıdi jasóspirim.
Tamırge qoǵamdyq jumys sabaǵyn jaqsy oqýǵa kedergi keltirmeıdi. Mektepti aıaqtaǵasyn, bolashaǵyn «programmıst» mamandyǵymen baılanystyrmaq.
«Assambleıa jastary» qoǵamdyq birlestiginiń múshesi 7 mamyr kúni óńirdiń eń jas belsendi volonteri retinde Petropavl qalasy ákiminiń alǵys hatymen marapattaldy, baǵaly syılyqtarǵa ıe boldy.
