Petropavlda 13 jasar qyzdy zorlaǵan erli-zaıyptyǵa sot úkimi shyqty
PETROPAVL. KAZINFORM — Petropavlda jasóspirim qyzǵa qatysty seksýaldyq zorlyq jasaǵan 37 jastaǵy er adam men onyń 32 jastaǵy zańdy nekege turmaǵan áıeli sottaldy.
Sot materıaldaryna sáıkes, erli-zaıypty Petropavldaǵy Jumysshy kentinde turǵan. Er adam — kondıter, áıeli sanıtar bolyp eńbek etken. Olardyń eki balasy bar.
Oqıǵa bolǵan kúni er adamnyń úıine týysy óziniń 13 jastaǵy tanys qyzymen birge qonaqqa kelgen. Keıin kámeletke tolmaǵan qyz seksýaldyq zorlyq-zombylyqtyń qurbany bolǵan.
Bul týraly oqýshy qyzdyń ata-anasy bilgennen keıin polıtsııaǵa júgingen. Іs boıynsha sot otyrysy jabyq rejımde ótti.
Sot er adamdy kámeletke tolmaǵanǵa qatysty seksýaldyq sıpattaǵy zorlyq-zombylyq áreketterin jasaǵany úshin kináli dep tanyp, ómir boıyna bas bostandyǵynan aıyrý jazasyn taǵaıyndady. Ol jazasyn tótenshe qaýipsizdik mekemesinde óteıdi.
Al onyń áıelin sot qylmysqa járdemdeskeni úshin kináli dep tanyp, 20 jylǵa bas bostandyǵynan aıyrý jazasyna kesti. Ol jazasyn ortasha qaýipsizdik mekemesinde óteıdi.
Sondaı-aq sot jábirlenýshi taraptyń talabyn qanaǵattandyryp, sottalǵandardan qyzǵa keltirilgen moraldyq zııan úshin 6 mln teńge tóleýge mindettedi. Budan bólek, sot saraptamasyn júrgizýge jumsalǵan 3,6 mln teńge shyǵyndy da sottalǵandar óteıdi.
Sot sottalǵandardyń balalaryna qatysty da jeke qaýly shyǵaryp, olardyń ekeýin de qorǵanshylyq jáne qamqorshylyq organdaryna berýdi tapsyrdy.
Sot úkimi ázirge zańdy kúshine engen joq.
Buǵan deıin Astanada satyp alýshylardy aldaǵan avtosalon dırektory sottalǵanyn jazǵan edik.
