Petropavlda 11 myńnan astam turǵyn «Birgemiz» qorynan materıaldyq kómek alady
«Nur Otan» partııasy SQO fılıalynyń málimetinshe, «Birgemiz-Qyzyljar» aımaqtyq qory qarjylaı kómekti 3669 muqtaj janǵa taratty. Tólemderdi uıymdastyrýdy, úılestirýdi jáne baqylaýdy partııanyń óńirlik fılıaly júzege asyrady.
«Qordan 7 sanatqa kiretin azamattar materıaldyq kómek ala alady. Olar – az qamtylǵan kópbalaly otbasylar, 1 jáne 2 toptaǵy múgedekter, múgedek balany tárbıelep otyrǵan otbasylar, eń tómengi zeınetaqy alatyn jáne halyqtyń áleýmettik jaǵynan osal tobynyń tizimine kiretin jasyna baılanysty zeınetkerler, jetim balalar men asyraýshysynyń birinen aırylǵan balalar, Uly Otan soǵysyna qatysýshylar men olarǵa teńestirilgen múgedekter, sondaı-aq ómirlik qıyn jaǵdaıda júrgen tyl eńbekkerleri. Alýshylardyń tizimin jasaýmen jergilikti atqarýshy organdar aınalysady. Qajetti aqparatty 8 (7152) 50-14-19 jáne 8 (7152) 36-91-67 telefondary arqyly bilýge bolady», - deıdi fılıal tóraǵasynyń birinshi orynbasary Ásem Rahmetova.
Mamyr aıynyń basynda tólem jasaýdyń ekinshi kezeńi bastalady. Bul joly 50 myń teńge 7844 adamǵa berilmek. «Jas Otan» jastar qanatynyń volonterlik toptarynyń kúshimen azyq-túlik paketterin taratý áli de jalǵaspaq. Ásem Rahmetovanyń aıtýynsha, naýryz aıynan beri oblys boıynsha 1900-den astam adamǵa antıseptıkalyq, gıgıenalyq quraldar jáne azyq-túlik jetkizilgen.
«Bizdiń eriktiler kún saıyn 5-ten 10-ǵa deıin mekenjaıdy aralap shyǵady. «Biz Birgemiz» partııalyq aktsııasyn qala men oblystyń belsendi azamattary, Petropavldyń teńizshiler klýbynyń músheleri, Soltústik Qazaqstan memlekettik ýnıversıteti, jekelegen bastapqy partııa uıymdary, tanymal mádenıet jáne óner qaıratkerleri, sportshylar, jýrnalıster belsendi qoldady», - dedi Ásem Rahmetova.
