Petropavlda 103 jastaǵy soǵys ardageri Valentına Volkodav dúnıeden ótti

PETROPAVL. KAZINFORM — Petropavlda Jeńis kúnine sanaýly kúnder qalǵanda Ekinshi Dúnıejúzilik soǵys ardageri Valentına Volkodav ómirden ozdy.

Valentına Volkodav 19 jasynda maıdanǵa attanǵan. Ol Belarýs jáne Ýkraına maıdandarynda kópir salý batalony quramynda jaýyngerlik mindet atqaryp, soǵys jyldarynda aldyńǵy shepke jol ashqan batyr qurylysshy retinde este qaldy. Jaý oǵynyń astynda júrip, iskerdiń alǵa jyljýyna jol ashty. Onyń maıdan joly Edil jaǵalaýynan bastalyp, Berlınge deıin jalǵasty.

Kórsetken erligi men qaısarlyǵy úshin Valentına Volkodav II dárejeli Otan soǵysy ordenimen jáne birqatar medalmen marapattaldy.

Soǵystan keıin beıbit ómirge oralyp, el ıgiligi úshin eńbek etken Valentına Arhıpovna qazirgi Astanada keramıkalyq zaýytta býhgalter bolyp qyzmet atqardy. Keıingi otyz jyldan astam ýaqytyn Petropavlda ótkizip, aınalasyndaǵylarǵa ómirge degen qushtarlyǵymen úlgi bola bildi.

Soltústik Qazaqstan oblysynyń ákimi Ǵaýez Nurmuhambetov marqumnyń jaqyndary men týystaryna kóńil aıtyp, ardagerdiń jarqyn beınesi halyq jadynda máńgi saqtalatynyn jetkizdi.

— Soǵystyń aýyrtpalyǵyna qaramastan, Valentına Arhıpovna árdaıym jarqyn júzdi, qaıratty ári ómirge qushtar jan boldy. Bıyl ol 103 jasqa tolyp, sergektigimen kópshilikti qýantty. Naǵyz batyrdyń jarqyn beınesi júregimizde máńgi saqtalady, — dedi aımaq basshysy.

SQO-da bıyl Jeńisti eki maıdanger qarsy alady. Buǵan deıin Petropavlda taza aýa jutýǵa shyqqan Ekinshi Dúnıejúzilik soǵys ardageri Vasılıı Makıenko oıda-joqta jaraqat alyp, aýrýhanaǵa túskenin jazǵan edik.