Petropavlda 100 jańa avtobýs satyp alynady
PETROPAVL. QazAqparat – Petropavlda qoǵamdyq kólikter jańartylady. Bıyl oblys ortalyǵyna 100 jańa avtobýs satyp alynbaq, dep habarlaıdy QazAqparat tilshisi.
Petropavl ákimi Bolat Jumabekov jańa avtobýstarǵa qatysty túsinik berdi. Jaqynda oblys ortalyǵyna alynǵan birneshe qoǵamdyq kólik testileýden ótpeı qaıta qatarylǵan edi.
«2021 jyly 100 avtobýs satyp alynady. Yotong markali bul kólikter dızel otynymen júredi. Onyń 60-y 8,5 metrlik, qalǵany 10,3 metrlik. «BRK-Lızıng», «Soltústik» ÁKK jáne tasymaldaýshylar arasynda avtobýstardy satyp alý jóninde kelisim bar. Jańa qoǵamdyq kólikter shilde-tamyz aılarynda jetkizilýi kerek», - deıdi qala ákimi.
Bolat Jumabekov turǵyndar tarapynan shaǵymnyń kóp bolýyna baılanysty 14 baǵytqa qyzmet kórsetetin kásipkermen kelisimsharttyń buzylǵanyn aıtty. Jaqynda №2 jáne №24 baǵyttardyń da tasymaldaýshylary ózgermek. Sebep – sapasyz qyzmet.
Jalpy Petropavlda 20 baǵyt bar. Onyń 10-y avtobýstyq, sonshasy shaǵyn avtobýs baǵyttary. Qala ishinde jolaýshylardy 197 qoǵamdyq kólik tasymaldaıdy. Al 23-i rezervte tur. Bul baǵyttarda 11 tasymaldaýshy, 4 JShS jáne 7 jeke kásipker jumys isteıdi.
Jaqynda petropavldyqtardyń keıbiri qoǵamdyq kólikterde tegin júretin bolady.
«Azamattardyń 12 sanaty qoǵamdyq kólikte tegin júredi. Petropavl qalasynyń ákimdigi olarǵa qyzmet kórsetetin tasymaldaýshylar shyǵynǵa batpaýy úshin ótemaqy tóleýdi josparlaǵan. Tegin júretin turǵyndarǵa arnaıy karta jasalady. Basqa qujatty kórsetýdiń qajeti bolmaıdy jáne bul karta boıynsha avtobýsta júrýge shekteý bolmaıdy. 1 maýsymnan bastap kólik kartalaryna tapsyrys qabyldanyp jatyr. Ol úshin jumyspen qamtý bólimine ótinim qaldyrý kerek. Búginge deıin 1356 adam ótinish qaldyrdy», - deıdi Bolat Jumabekov.
