Petropavlda 100 saıajaı ýchaskesin sý basty
PETROPAVL. QazAqparat – Petropavlda Esil ózeni tasyp jatyr. Búginde qala mańyndaǵy 100 saıajaı ýchaskesin sý basyp, «Novosibir-Chelıabi» halyqaralyq mańyzdaǵy tas joly jabyldy, dep habarlaıdy QazAqparat tilshisi.
Petropavldaǵy Esil ózeni sýynyń deńgeıi 12 sáýirden bastap kúndelikti 40-45 sm kóterilip jatyr. «Qazgıdromet» RMK SQOF bergen málimet boıynsha, búgin tańerteń sý deńgeıi 987 sm jetti. Saldarynan «Novosibir-Chelıabi» tas jolynyń 529 shaqyrymyn sý basyp, trassa ýaqytsha jabyldy.
«Oblys aýmaǵynda 19 gıdrologııalyq beket bar. Mamandar kúndelikti sýdyń deńgeıin, jyldamdyǵyn, shyǵynyn ólshep, bul málimetti SQO Tótenshe jaǵdaılar departamentine beredi. Al Departament birge sý basý qaýpi bar ýchaskelerge kúndelikti monıtorıng júrgizedi», - deıdi «Qazgıdromet» RMK SQOF dırektory Qymbat Merǵalımova.
Búginde Petropavl sý qoımasy 114 % tolyq. Qala mańyndaǵy ózen alqaby sýǵa toldy. Oblystyq Tótenshe jaǵdaılar departamentiniń málimetinshe, qazirgi tańda jeke sektordaǵy turǵyn úılerge sý kirmegenimen, Teplıchnoe, Zarechnyı kentterindegi 100 saıajaı ýchaskesi sý astynda qaldy.
«240 adamdy esepke aldyq. Olar saıajaı ýchaskelerinde ýaqytsha turyp jatqandar. Profılaktıkalyq áńgime júrgizildi, evakýatsııalyq pýnktterdiń mekenjaıy berildi. Sý áli keledi. Sınoptıkterdiń boljamy boıynsha, Esil ózeniniń sharyqtaý shegi aldaǵy eki-úsh kúnde bolady. Turǵyndarǵa eskertip jatyrmyz», - deıdi SQO Tótenshe jaǵdaılar departamentiniń basqarma bastyǵynyń mindetin atqarýshy Serik Naýryzbaev.
Aldaǵy birer kúnde Petropavldaǵy Zarechnyı kentindegi saıajaı ýchaskelerin sý basyp, jaıylǵan sý shetkeri kóshelerdegi turǵyn úılerge de jetpek. Mamandardyń boljamynsha, tasqyn sýdyń saldarynan Prıbrejnoe eldi mekenine aparatyn jol úzilmek.
Buǵan deıin sınoptıkter Petropavldaǵy Esil ózeni sýynyń kóktemdegi qaýipti deńgeıin aıtyp, eskertý jarııalaǵan edi.
