Petropavlda 10 jyl buryn salynýy tıis yqsham aýdannyń qurylysy bastaldy
ASTANA. QazAqparat - Petropavlda 10 jyl buryn salynady dep habarlanǵan jańa yqsham aýdannyń qurylysy bastaldy, dep habarlaıdy QazAqparat.
«Bıyl «Jas Órken» jańa shaǵyn aýdanynyń aýqymdy qurylysyn bastadyq. Bul úshin ótken ǵasyrdyń 50-shi jyldary salynǵan, tozyǵy jetken 500 jer úı buzylyp, ornyna 2,5 myń jańa páter salynady. Úı ıelerine ótemaqy alý nemese jaıly jaǵdaı jasalǵan baspana tańdaý quqyǵy beriledi. Turǵyndardyń 70 paıyzy baspana alýǵa kelisti», - dedi Qumar Aqsaqalov Ortalyq kommýnıkatsııa qyzmetinde ótken baspasóz máslıhatynda.
Oblys ákiminiń aıtýynsha, jańa yqsham aýdanda 300 oryndyq kontsert zaly men 150 oryndyq májilis zaly bar, IT-tehnologııalar ortalyǵy bar, jalpy aýdany 13 myń sharshy metrden asatyn tórt qabatty Oqýshylar saraıy turǵyzylady. Sondaı-aq, 4 jabyq jáne 3 ashyq tennıs alańy bar ámbebap tennıs ortalyǵy men záýlim turǵyn úıler salynady.
«Qazirgi ýaqytta shaǵyn aýdan mańyndaǵy kópirdi tolyq jóndeýden ótkizip jatyrmyz. Ázirge úsh úıdiń, Oqýshylar saraıynyń jáne tennıs ortalyǵynyń qurylysy bastaldy. Bes úıdiń qurylysy kelesi jyly aıaqtalady. Taǵy alty úıdiń qurylysy arǵy jyldyń enshisinde», - dep óz sózin tolyqtyrdy ákim.
Aıta keteıik, jańa yqsham aýdannyń salynatynyn qazaqstandyq BAQ 10 jyl buryn habarlaǵan edi. Qala damýynyń bas josparyn QR Úkimeti 2007 jyly bekitken.
