Petropavlda 10 jasar balany kólik qaǵyp ketti
PETROPAVL. QazAqparat – Petropavlda avtojoldan ótip bara jatqan 10 jasar balany kólik qaǵyp ketti, dep habarlaıdy QazAqparat tilshisi.
Soltústik Qazaqstan oblystyq Polıtsııa departamenti baspasóz qyzmetiniń málimetinshe, Býketov kóshesin belgilenbegen jerden qıyp ótpek bolǵan 2010 jyly týǵan balany « Toyota Avensis» kóliginiń júrgizýshisi qaǵyp ketti. Jaraqat alǵan bala oblystyq balalar aýrýhanasyna jatqyzyldy. Osy derekke qatysty materıal jınalyp, protsessýaldyq sheshim qabyldaý úshin Petropavldaǵy ákimshilik polıtsııa bólimine tapsyryldy.
Jazǵy demalys qarsańynda polıtseıler men muǵalimder oqýshylarǵa jolda júrý erejesin: belgilengen jerlerde ǵana joldy kesip ótýge, velosıped jáne samokatpen júrgen kezinde jol qozǵalysy erejelerin jáne joldardaǵy basqa da qaýipsizdik erejelerin qatań saqtaýǵa eskertip, keshendi profılaktıkalyq sharalar júrgizdi. Soǵan qaramastan, oblys ortalyǵynyń kóshelerinde balalar jıi jaraqat alyp jatady.
«Balalar demalysta kóp ýaqyttaryn dalada ótkizedi. Eresekter olarǵa baqylaýdy eki ese kúsheıtýleri kerek, únemi profılaktıkalyq áńgimeler júrgizýleri qajet. Velosıpedpen jaıaý júrginshiler jolaǵynan ótý tártibi jaıynda, jol júrý erejeleri týraly únemi aıtylǵanymen, jol qozǵalysyna qatysýshylar, onyń ishinde mektep jasyndaǵylar joldaǵy tártipti saqtamaı jatady. Saldarynan joldaǵy apatqa ákelip jatady», - deıdi SQO Polıtsııa departamenti bastyǵynyń birinshi orynbasary Qanat Aıtbaev.
Polıtseıler jaıaý júrginshiler jıi qoldanatyn qulaqqaptardy jolda taǵyp júrýdiń qaýipin eske saldy. Baǵdarsham nemese rettelmeıtin jaıaý júrginshiler ótkelimen júretin velosıpedshiler de jolda júrý erejelerin qatań saqtaǵany durys. Velosıpedshi kenetten shyǵyp qalsa, jyldamdyq rejımine baılanysty júrgizýshi kóligin tejep úlgermeı qalý múmkin.
«Tek jol qozǵalysy erejelerin saqtaý men qyraǵylyq - joldaǵy qaýipsizdik kepili bola alady», - deıdi tártip saqshylary.
