Petropavlda 10 kúnge ystyq sý berý toqtatylmaq

PETROPAVL. KAZINFORM – Petropavlda kelesi jylytý maýsymyna daıyndyq barysynda 10 kúnge ystyq sý berý toqtatylady.

«Sevkazenergo» AQ málimetinshe, oblys ortalyǵyn ystyq sýmen qamtý 10 maýsym kúni toqtatylyp, tek 20 maýsym ǵana berile bastamaq. 

Bul aralyqta «Petropavl Jylý Júıeleri» JShS Qazaqstan Respýblıkasynyń normatıvtik-quqyqtyq aktileriniń talaptaryna sáıkes jylý jelilerin gıdravlıkalyq synaqtan ótkizedi. 

Synaqtyń maqsaty - kelesi jylytý maýsymyna daıyndalý, qubyrlardaǵy jáne jylý jelileri men jabdyqtardaǵy aqaýlardy anyqtaý.

Synaq kezeńinde barlyq magıstraldyq jelilerdegi qysym jumys kezindegi qysymnan 25% joǵary bolady. Sonymen qatar jelidegi sýdyń temperatýrasy +40 gradýstan aspaıdy. 

Synaqtar aıaqtalǵannan keıin úılerge ystyq sý kezeń-kezeńimen qosylady. Al aqaýlar anyqtalǵan jaǵdaıda magıstraldyq jelilerdiń ýchaskeleri jóndeledi, al osy ýchaskelerdegi turǵyn úılerde ystyq sý bolmaıdy.

Kompanııa ókilderiniń aıtýynsha, «Petropavl Jylý Júıeleri» JShS-de jumysty jedel aıaqtaý úshin qajetti qubyr, qalpyna keltirý materıaldary jetkilikti, qosymsha qyzmetkerler jumyldyrylǵan.

Buǵan deıin jer silkinisin eskertetin júıe synaqtan ótip, almatylyqtar prezıdenttik habarlama alǵanyn aıtqan edik.