Petropavlda 10-qabattaǵy páterdiń ashyq terezesinde bala otyrǵan
PETROPAVL. QazAqparat - Petropavlda turǵyn úıdin janynan ótip bara jatqan adamdar 10-qabattaǵy páterdiń ashyq qalǵan terezesinde otyrǵan 6 jasar qyzdy kórgen, dep habarlaıdy QazAqparat.
Soltústik Qazaqstan oblysy TJD baspasóz qyzmetiniń málimetinshe, «Báıterek» turǵyn úıge keshenine dereý qutqarýshylar jiberilgen. Ashyq turǵan terezeden balanyń qulap ketýi múmkin edi.
«Qutqarýshylar kelgen sátte, qaýipti sezingen qyz bala páterge kirgen. Osy oqıǵaǵa baılanysty órt sóndirý jáne apatty qutqarý jumystary qyzmetiniń psıholog mamany Laýra Shaıkenova 6 jasar Taısııanyń anasymen kezdesti. Sol kúni túngi aýysymnan kelgen anasy uıyqtap qalǵan eken», - dep habarlaıdy TJD baspasóz qyzmeti.
«Balalardyń áýesqoılyǵy men ata-analarynyń salǵyrttyǵy saldarynan kún jylynǵan kezde balalardyń abaısyzda terezeden qulap ketýi jıileıdi. Mundaıda masaǵa qarsy tor da qutqara almaıdy. Ol qaýipsiz bolyp kóringenimen, aýyr salmaqqa shydas bermeıdi. Sondyqtan balalardy qaraýsyz qaldyrýǵa bolmaıdy», - delingen habarlamada.
