Petropavlda 1 qazan kúni zeınetkerler qoǵamdyq kólikte tegin júredi

PETROPAVL. QazAqparat – Petropavlda 1 qazan kúni zeınetkerler qoǵamdyq kólikpen baratyn jerlerine tegin jete alady, dep habarlaıdy QazAqparat tilshisi.

Petropavl qalalyq turǵyn úı-kommýnaldyq sharýashylyǵy bóliminiń málimetinshe, erteń, Qarttar kúnine oraı oblys ortalyǵynda zeınetkerler qoǵamdyq kólikte tegin júre alady. Ol úshin kondýktorǵa zeınetker kýáligin kórsetý jetkilikti.

Bul qaıyrymdylyq sharasy – dástúrli. On jyldan artyq merekege oraı osyndaı jeńildik jasalyp keledi.

Petropavlda qazirgi ýaqytta 44,5 myń zeınetker bar. Olardyń jasy 80-nen asqandary qalalyq ákimdiktiń sheshimimen avtobýstarda tegin júre alady. Sondaı-aq, bıyldan bastap oblys ortalyǵynda 12 sanatqa jatatyn azamattar – 10 myńǵa jýyq turǵyn qalalyq qoǵamdyq kólikte tegin qatynaıdy.