Petropavl jylý ortalyǵynyń qulaǵan murjasy bıylǵy qysqa deıin salynyp bitpeıdi

PETROPAVL. QazAqparat – Petropavldaǵy №2 jylý-elektr ortalyǵy jańa jylytý maýsymyna ázir. Bıyl stantsııadaǵy qazandyqtar men týrbo-agregattardy jónge keltirýge 7,5 mlrd teńge jumsaldy, dep habarlaıdy QazAqparat tilshisi.

«Sevkazenergo» AQ bas dırektory Anatolıı Kazanovskıı №2 jylý-elektr ortalyǵynyń jylytý maýsymyna daıyndyǵy jaıynda aıtyp berdi.

«Alty qazandyq-agregattaǵy jóndeý jumystary tolyq aıaqtaldy. №11 qazandyq-agregatta kúrdeli jóndeý júrgizildi, óıtkeni byltyrǵy jylytý maýsymynda negizgi aýyrtpalyq osy nysanǵa tústi. Bizde barlyǵy 12 qazandyq-agregaty bar. 15 qyrkúıekte toǵyzy daıyn bolady, jeltoqsannyń birine 11 qazandyq jumys istemek. Al №2 qazandyq qalpyna keltirilip jatyr, jumys tek 2025 jyly ǵana aıaqtalady. Byltyr qysta 8 qazandyq agregaty jumys istedi. Toǵyzynshysyn únemi rezervte ustap otyrdyq», - deıdi Anatolıı Kazanovskıı.

Qazandyqtyń eń eskisi 1961 jyly salynǵan. Mamannyń aıtýynsha, olardyń árqaısysy belgili bir saǵat jumys isteýi kerek.

Mysaly №2 qazandyq agregatyn aýystyrý qajet, ol norma boıynsha 300 myń saǵat jumys isteýi kerek bolsa, is júzinde 322 myń saǵatqa jetken.

Sol sebepti buzyp alynyp, jańasy salynyp jatyr. 2025 jylǵa deıin tek qajettilik boıynsha aǵymdaǵy jáne kúrdeli jóndeý júrgizilmek.

«Týrbo-agregattarǵa keler bolsaq, jóndeý jumysy beseýinde aıaqtaldy, qazir altaýy jumys istep tur, bireýi jóndelip jatyr. Stantsııada qazir eki tútin murjasy bar. Bıyl №2 tútin murjasy mamandardyń tekserisinen ótti, jumysqa jaramdy, sondaı-aq onyń ústine durys jumys isteýge qajet shoıyn kúmbez ornattyq. №3 tútin murjasy da tekserildi, murja baǵany ishinen qyshqylmen óńdeldi, syrty qorǵanys syrmen syrlandy. Qazir jańa jylytý maýsymyna tolyq daıyn tur. Byltyr jobalyq ınstıtýttarmen jumys istep, tútin murjalaryn zerttep, nátıjesinde stantsııa aldaǵy úsh jylytý maýsymynda eki murjamen de jumys isteı alatyndyǵy týraly qorytyndy aldyq. Jańadan salynyp jatqan 180 metrlik murja jobaǵa saı kelesi jyly shilde aıynda qoldanysqa berilýi tıis. Biraq qazirgi salynyp jatqan murjanyń qısaıyp ketýine baılanysty ol buzylyp jatyr. Tekseris júrgizildi, 39-ynshy metrinen bastap 26 metri buzyp alynady. Qazir gaz joldaryn salýdy bastap kettik, ol jospar boıynsha tek keler jyly júrgizilýi kerek edi. Bizdiń jospar boıynsha murja qurylysynda kesteden qalyp jatqan joqpyz», - deıdi Anatolıı Kazanovskıı.

Bıyl kompanııa jylý ortalyǵyna jóndeý jumystaryna 7,5 mlrd teńge jumsaýdy josparlaǵan.

Al murjany salýǵa 2,8 mlrd teńge bólingen. Byltyr 15 mlrd teńge jumsalǵan eken.