Petropavl jylý ortalyǵyndaǵy apat: Jaǵdaı qalypqa kele bastady
PETROPAVL. QazAqparat – Petropavldaǵy «2-Jylý-elektr ortalyǵy» JShS-de besinshi qazandyq agregaty iske qosylyp, nysan qalypty kórsetkishterge orala bastady, dep habarlaıdy QazAqparat tilshisi.
Soltústik Qazaqstan oblysy ákimi baspasóz qyzmetiniń málimetinshe, saǵat 17.00-de jylý-elektr ortalyǵyndaǵy besinshi qazandyq agregaty qosyldy.
Qazirgi ýaqytta elektr qýaty generatsııasy 105 MVt-tan 110 MVt-qa deıin artty.
Jylý berý kórsetkishteri de joǵarylap keledi. Jospar boıynsha berý/keri qaıtý 70°S/50°S bolsa, qazir 58°S/40°S-qa deıin kóterildi.
Esterińizge salaıyq, 20 naýryz kúni saǵat 19.20-da Petropavldaǵy jylý-elektr ortalyǵynda tútin murjasy jartylaı qulap, saldarynan 5 qazandyq agregatyn toqtatýǵa týra kelgen edi. Oblys ortalyǵyna jylýdy eki qazandyq agregaty ǵana berdi. Saldarynan turǵyn úılerde jylý kúrt tómendedi.
Osy apatqa oraı Prezıdent SQO ákimine turǵyndardy tez arada jylýmen qamtýdy tapsyrdy.
Qazirgi ýaqytta qylmystyq is qozǵalǵan.
SQO prokýratýrasy «2-Jylý-elektr ortalyǵy» JShS dırektory men bas ınjeneriniń ýaqytsha ustaý ızolıatoryna qamalǵanyn málimdedi.
Al úıindi astynda qalǵan jumysshy áıeldiń denesi búgin tańerteń tabyldy. Kompanııa basshylyǵy mert bolǵan mashınıstiń otbasyna kómek kórsetetin boldy.
