Petropavl jylý ortalyǵynda mert bolǵan jumysshynyń otbasyna kómek kórsetiledi
PETROPAVL. QazAqparat – Petropavldaǵy «2-Jylý-elektr ortalyǵy» JShS tútin murjasy qulaǵan kezde úıindi astynda qalyp mert bolǵan jumysshynyń otbasyna materıaldyq kómek kórsetedi, dep habarlaıdy QazAqparat tilshisi.
«SevKazEnergo» AQ basshylyǵy men ujymy Petropavl «2-Jylý-elektr ortalyǵy» JShS-de mert bolǵan Natalıa Chefonovanyń otbasyna jáne týystaryna qaıǵyryp kóńil aıtty.
«SevKazEnergo» AQ baspasóz qyzmetiniń málimetinshe, kompanııa basshylyǵy N. Chefonovanyń otbasyna turǵyn úı jaǵdaıyn jaqsartýǵa, qaıtys bolǵan jumysshynyń bes jyldyq eńbekaqysy mólsherinde otbasyna qarjylyq ótemaqy tóleý túrinde qoldaý kórsetedi, sondaı-aq N. Chefonovanyń balasynyń bilim alý shyǵyndaryn jabady. Jerleýdi uıymdastyrýǵa baılanysty barlyq shyǵyndardy jumys berýshi jaq óz moınyna almaq.
Apattyń sebebi memlekettik komıssııanyń qorytyndysynan keıin belgili bolmaq.
Esterińizge salaıyq, 20 naýryz kúni Petropavldaǵy «2-Jylý-elektr ortalyǵy» JShS tútin murjasy opyrylyp túsip, qazandyq tsehynda jumys istep jatqan mashınıst-qaraýshy Natalıa Chefonova úıindi astynda qaldy. 1984 jyly týǵan áıeldi arnaıy qyzmetter bir táýlik boıy izdedi. Búgin saǵat 10.30-dar shamasynda áıeldiń denesi tabyldy.
Natalıa Chefonovanyń artynda 15 jastaǵy balasy qaldy.
