Petropavl jylý elektr ortalyǵynda eki qazandyq apattyq jaǵdaıda, jeteýi istep tur

PETROPAVL. QazAqparat – Petropavldaǵy ekinshi jylý-elektr ortalyǵynda 12 qazandyq agregatynyń jeteýi istep tur. Jylý maýsymy shtattyq rejimde ótip jatyr, dep habarlaıdy QazAqparat tilshisi.

Soltústik Qazaqstan oblysynyń qoǵamdyq keńesinde jylý maýsymynyń ótý barysy jáne №2 JEO jumysynyń sapasyn arttyrý máselesi qaraldy.

SQO energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Evgenııa Ostrovskaıanyń aıtýynsha, 24 qyrkúıek bastalǵan jylytý maýsymy óńirde kestege saı ótip jatyr.

Oblys ortalyǵyn jylýmen qamtıtyn 2-JEO-da jóndeý-qalpyna keltirý jumysy júrip jatyr.

«Qazirgi ýaqytta 12 qazandyq agregatynyń jeteýi jumys istep tur. №1,11 qazandyqtar apattyq jóndeýde, №3 qazandyq jospar boıynsha jóndelse, №2 qazandyq qalpyna keltirilip jatyr. Al 7 týrboagregattyń beseýi iske qosylǵan, ekeýi – rezervte», - deıdi Evgenııa Ostrovskaıa.

«Sevkazenergo» AQ №2 JEO-nyń jumysyn qalpyna keltirý maqsatynda Jol kartasyn júzege asyryp jatyr.

Onyń aıasynda kásiporynda jóndeý-qalpyna keltirý jumystaryn atqarý úshin aktsıoner 17 mlrd teńge bóldi. Onyń 12,5 mlrd teńgesi byltyr ıgerildi.

Qalǵany bıyl jumsalady. Jóndeý jumystary 230 jumysshysy bar merdiger kompanııaǵa bekitilgen.

Bıyl 20 naýryzda josparly jumys júrip jatqan №3 qazandyqta jóndeý aıaqtalady.

«№2 JEO-da kómir men mazýttan da tapshylyq joq. Qazir ortalyqta 133 myń tonna kómir bar, bul 22 táýlikke jetedi. Jolda taǵy 4,5 myń tonnasy kele jatyr. Budan basqa 1365 tonna mazýt» bar», - deıdi Evgenııa Ostrovskaıa.