Petropavl jylý jelileri kommýnaldyq menshikke berilmek
PETROPAVL. KAZINFORM — «SEVKAZENERGO» kompanııasy men Petropavl ákimdigi arasynda qazir jylý jelilerin kommýnaldyq menshikke berý máselesi talqylanyp jatyr.
Petropavl qalasy ákimi baspasóz qyzmetiniń málimetinshe, negizgi maqsat — qalanyń jylýmen jabdyqtaý júıelerin basqarýdy biriktirý. Bul qadam júıeni tolyq jańǵyrtýǵa, energııany únemdeýge jáne júıeniń úzdiksiz, turaqty jumys isteýine múmkindik beredi. Qazir Petropavldaǵy jylý jelileriniń tozý deńgeıi 70% asady.
Nátıjesinde «Energetıka jáne kommýnaldyq sektordy jańǵyrtý» ulttyq jobasyn iske asyrýǵa jáne tutynýshylar úshin tarıfterdiń aıtarlyqtaı ósýin tejeý múmkin bolmaq.
— Ulttyq jobaǵa qatysý jáne basqarýdy biriktirý memleket tarapynan jylý ınfraqurylymyn jańǵyrtýǵa qarjy tartýǵa múmkindik beredi. Bul óz kezeginde qazirgideı apattardy joıýdan góri júıeli jańartý júrgizýge jáne tarıftik júktemeni azaıtýǵa jaǵdaı jasaıdy. Jaryq pen jylýdyń úzilissiz berilýi, turǵyndar men kásiporyndarǵa turaqty ári sapaly qyzmet kórsetý. Ári tarıfterdiń turaqtylyǵyn jáne ekonomıkalyq negizdiligin qamtamasyz etýge, sondaı-aq olardyń kúrt ósýiniń aldyn alýǵa baǵyttalǵan, — deıdi Petropavl qalasy ákiminiń baspasóz hatshysy Tımýr Jumanov.
Mamannyń aıtýynsha, talqylanyp jatqan kelisimniń negizgi sharttary: aldaǵy jáne kelesi jylytý maýsymdarynda jylý jelileriniń úzdiksiz jumysyn qamtamasyz etý;
«Petropavl jylý jelileri» JShS qyzmetkerleriniń eńbek quqyqtary men kepildikterin tolyq saqtaý;
Barlyq rásimniń QR qoldanystaǵy zańnamasyna qatań sáıkestikte júrgizilýi.
— Sonymen qatar, kommýnaldyq menshikke berýdiń mańyzdy sharty — «Petropavl jylý jelileri» JShS-niń jetkizýshiler, merdigerler, qyzmetkerler jáne basqa da seriktester aldyndaǵy kredıtorlyq beresheginiń bolmaýy.
Barlyq múddeli taraptar, sonyń ishinde buqaralyq aqparat quraldary, qujattardyń túpkilikti paketi bekitilgennen keıin resmı túrde habardar etiledi. Barlyq rásimderdi 2025 jyldyń sońyna deıin aıaqtaý josparlanyp otyr — delingen Petropavl qalalyq ákimdiginiń habarlamasynda.
Buǵan deıin Aqtaý qalasynyń jylý jelilerin rekonstrýktsııalaýǵa Úkimet rezervinen 3,6 mlrd teńge bólingenin jazǵan edik.