Petropavl jylytý maýsymyna daıyn ba

PETROPAVL. KAZINFORM – Petropavlda bıyl qolǵa alynǵan aýqymdy joba aıasynda 2,1 km jylý jelisi aýystyrylady.

SQO Energetıka jáne turǵyn úı-kommýnaldyq sharýashylyq basqarmasynyń málimetinshe, oblystyq ákimdiktiń bastamasymen ázirlengen joba quny 5,7 mlrd teńge, birneshe kezeń boıynsha júzege asyrylady. Bıyl 1,1 mlrd teńgege 500 m aýystyrý josparlandy. Alaıda 700 m tóseldi.

- Tarıfti ósirmeı ustaýdyń saldarynan óńirde jylý jelileriniń tozý deńgeıi joǵary. Taǵy bir másele – jylda 138 myń Gkal nemese 500 mln teńge jylý energııasyn joǵaltamyz. Olar shyǵyndardyń tarıftik smetasyna engizilmegen.

«Petropavl jylý jelileri» JShS de qazirgi tańda jylý júıelerin jańartý boıynsha birqatar jumysty atqaryp jatyr. Jylytý maýsymyna daıyndyq barysynda 0,9 shaqyrym jylý jelisin rekonstrýktsııalaýdy josparlasa, sonyń 0,5 km oryndaldy.

6,37 shaqyrym magıstraldyq jáne taratý jelilerin jóndeý josparlansa, onyń 6 shaqyrymy aıaqtaldy. Bul maqsatqa jalpy 1,5 mlrd teńge bólingen, - deıdi basqarma basshysynyń orynbasary Qýandyq Shaqýbaev.

SQO-da elektr energııasyn taratý jáne jelilerdi paıdalaný qyzmetterin -«Soltústik Qazaqstan Elektrjelisin taratý kompanııasy» AQ– 8 aýdan men Petropavl qalasyna jáne «Kókshetaý Energo» JShS 5 aýdanǵa kórsetedi.

Oblystaǵy jalpy elektr jelileriniń uzyndyǵy – 23 myń km bolsa, 4 myńǵa jýyq podstantsııa bar. Tozý deńgeıi – 91,5%.

- Jańa jylytý maýsymyna daıyndyq aıasynda 4,1 mlrd teńge bólindi. Qazirgi tańda 420 km elektr jelisiniń 313 km jóndeldi. 42 podstantsııanyń ornyna 43 podstantsııa jóndeldi. 189,5 km jelini jańǵyrtý kózdelgen, sonyń 5 km oryndaldy.

«Kókshetaý Energo» JShS tarapynan 1 mlrd teńge bólingen. 1077 km jelini jóndeý josparlanǵan, sonyń 911 km aýystyryldy. 11,7 km jańartylsa, 179 podstantsııanyń 172-si jóndeldi, - deıdi Qýandyq Shaqýbaev.

Mamannyń aıtýynsha, qazirgi ýaqytta qazandyqtardyń 94% daıyn. Bilim berý, densaýlyq saqtaý mekemeleri jylýdy qabyldaýǵa ázir.

Kópqabatty turǵyn úıler boıynsha másele bar.

- Oblystaǵy 1453 úıdiń 917-si daıyn, bul – 63%. 677 kópqabatty úıde jelilerdi jýyp-shaıý jumystary ótkizildi. Tek 20-sy ǵana ázirge daıyndyq pasportyn aldy, - deıdi basqarma basshysynyń orynbasary.

Byltyr Petropavlda jylytý maýsymy 30 qyrkúıekte bastaldy. Qala ákiminiń qaýlysynan keıin, ádette on kún ishinde, aldymen áleýmettik nysandarǵa keıin kezeń-kezeńmen turǵyn uılerge jylý beriledi.

Buǵan deıin SQO-da kómir qorynyń 66% daıyndalǵanyn jazǵan edik.