Petropavl «Jer saǵaty» aktsııasyna qatysty
PETROPAVL. QazAqparat – Petropavlda halyqaralyq «Jer saǵaty» aktsııasyna birneshe kásiporyn, mekemeler men oqý oryndary qatysyp, bir saǵatqa 20.30-dan 21.30-ǵa deıin elektr qýatyn ajyratty, dep habarlaıdy QazAqparat tilshisi.
Dúnıejúzilik «Jabaıy tabıǵat» qory uıymdastyrǵan «Jer saǵaty» halyqaralyq aktsııasy bıyl da Petropavlda qoldaý tapty. Bir saǵatqa elektr qýatynan bas tartatyn dástúrli is-sharanyń maqsaty - jurt nazaryn ekologııa máselesine aýdartý.
«Jer saǵaty» aktsııasy 2007 jyly alǵash ret Avstralııada ótkizildi. Qazir bul is-sharany álem elderi qoldaıdy. Petropavlda biz turǵyndardy, kásiporyndar, uıymdar men mekemelerdi belsendi qatysýǵa shaqyramyz. Bir saǵatqa elektr qýatynan bas tartý arqyly qoǵamnyń nazaryn ekologııa máselesine aýdaramyz», - deıdi SQO boıynsha «Adaldyq alańy» jobalyq ofısiniń jetekshisi Rýslan Asaýbaev.
Petropavlda «Jer saǵaty» aktsııasyna dástúrli túrde qatysatyndardyń biri – Soltústik Qazaqstan ýnıversıteti. Qashanda ıgi isterdiń basynda júretin jastar bul joly da ún qosty.
«Biz de «Jer saǵaty» aktsııasyna qatysyp jatyrmyz. Barlyq stýdentter óz úılerinde, jataqhanalarda bir saǵatqa elektr jaryǵyn, elektr qondyrǵylaryn óshiredi. Bul ýaqytty qyzyqty ótkizip, gıtarada nemese oıyndar oınaýǵa bolady», - deıdi SQÝ-diń geografııa-ekologııa kafedrasynyń stýdenti Erlan Ábdirahmanov.
Petropavlda ekologııalyq is-sharaǵa oraı shaǵyn aýdandarda kóshe jaryqtandyrýy birtindep sóndirildi.
«Jumysshy kentinen bastadyq. Keıin Bereke, Solnechnyı, Zarechnyı, Hromzaýyt, 19-shy, 20-shy, Oıqala, Zaısan yqsham aýdandarynda sóndirildi. Aktsııaǵa Petropavl ákimdigi qosyldy, qalanyń kórneki jerleriniń jaryqtandyrylýy óshirildi. «Qyzyljar Sý» jáne «Radýga» JShS qosyldy. Olar byltyr da bul is-sharaǵa qoldaý bildirgen edi», - deıdi SQO eko-ambassadory Azat Jumaǵul.
«SevKazEnergo» AQ baspasóz qyzmetiniń málimetinshe, kásiporyn elektr qýatyn toqtaýsyz óndiredi. Sol sebepti bul aktsııaǵa oraı eshkimdi de elektr qýatynan ajyrata almaıdy. Tutynýshylar tek ózdiginen ekologııalyq aktsııaǵa qosylyp, páterlerindegi jaryqty ýaqytsha óshire alady.
