Petropavl «Jer saǵaty» dúnıejúzilik ekologııalyq aktsııasyna qatysady

PETROPAVL. KAZINFORM – «Jer saǵaty» ekologııalyq aktsııasyna bıyl da Petropavldaǵy keı kásiporyn-mekemeler qatysýdy josparlap otyr.

Elimizde dúnıejúzilik aktsııa 22 naýryz kúni saǵat 20:30-dan 21:30-ǵa deıingi aralyqta ótedi.

Bıyl «Jer saǵaty» ekologııalyq is-sharasy «Taza Qazaqstan» aktsııasy aıasynda uıymdastyrylady. 

Petropavl qalalyq turǵyn úı-kommýnaldyq sharýashylyǵy bóliminiń málimetinshe, aktsııaǵa oraı oblys ortalyǵynda birneshe kóshede jaryq bir saǵatqa sóndiriledi. Olar: Músirepov kóshesinde Jambyl kóshesinen bastap JEO-2-ge deıin, ıA.Gashek kóshesinde Jambyl kóshesinen bastap JEO-2-ge deıin, Áýezov kóshesinde Indýstrıalnyı ótpesinen «Malodel» JShS zaýytyna deıin. 

Sondaı-aq Petropavldaǵy Qazaqstan Konstıtýtsııasy jaıaý júrginshiler kóshesinde de bir saǵat aralyǵynda elektr jaryǵy bolmaıdy. Biraq munda kezekpen ár 10 mınýtqa sóndirilmek.

«Jer saǵaty» aktsııasyn Dúnıejúzilik jabaıy tabıǵat qory uıymdastyrǵan, ekologııa men turaqtylyq máselelerine nazar aýdarýǵa baǵyttalǵan jahandyq is-shara.

Aktsııa azamattardy planetamyzdyń bolashaǵyna qamqorlyq belgisi retinde bir saǵatqa elektr jaryǵy men turmystyq elektr qurylǵylarynan bas tartýǵa shaqyrady. Osy kúni mıllıondaǵan adam 1 saǵatqa jaryq pen elektr qondyrǵylaryn sóndiredi. Sáýlet eskertkishteri jaryqtan ajyratylady.

Esterińizge salaıyq, Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev Qazaqstanǵa úsh atom elektr stansasyn salý kerektigin aıtqan edi.