Petropavl JEO-daǵy apatqa baılanysty qylmystyq is qozǵaldy
PETROPAVL. QazAqparat – Petropavldaǵy jylý-elektr ortalyǵyndaǵy apatqa baılanysta qylmystyq is qozǵaldy. Jumysshylardyń bireýi tabylmaı jatyr, dep habarlaıdy QazAqparat tilshisi.
Soltústik Qazaqstan oblysy prokýratýrasy baspasóz qyzmetiniń málimetinshe, JEO-daǵy tútin murjasynyń jartylaı qulaýyna baılanysty oblys ákimi jedel shtab qurdy. Ol jerde Petropavl turǵyndaryn tıisti jylýmen qamtýǵa qatysty barlyq is-sharalar qolǵa alynyp jatyr.
Oqıǵa ornynda barlyq arnaıy qyzmetter jumys isteýde. Qazirgi ýaqytta bir jumysshy – mashınıst-qaraýshy tabylmaı jatyr. Qutqarýshylar qutqarý-izdestirý sharalaryn qolǵa alǵan. Sondaı-aq oblys prokýrorynyń nusqaýymen arnaıy qurylǵan jedel-tergeý toby attandy. Osy oqıǵaǵa baılanysty qylmystyq is qozǵalyp, alǵashqy tergeý sharalary júrgizilip jatyr.
Tútin murjasynyń qulaý sebebin anyqtaý úshin mamandar jumyldyrylyp, tıisti saraptamalar júrgiziledi. Jaǵdaıdy SQO ákimi men oblys prokýrory baqylaýǵa aldy.