Petropavl JEO-2 jańa tútin murjasy qoldanysqa daıyn
PETROPAVL. KAZINFORM — Petropavldaǵy 2-shi jylý-elektr ortalyǵynyń jańa tútin murjasynda syrlaý jumystary merzimine bir aı buryn aıaqtaldy.
«SEVKAZENERGO» AQ baspasóz qyzmetiniń málimetinshe, bıiktigi 180 metr bolatyn jańa tútin murjasynda syrlaý jumystary 25 maýsymda bastalyp, tamyz aıynda aıaqtalady dep josparlandy.
Murja dástúrli qyzyl-aq jolaqty túske syrlandy. Mundaı túske boıaýdyń birneshe sebebi bar, sonyń biri — avıatsııalyq qaýipsizdik talaptary. Ashyq, kózge kórinetin túster áýe kólikterine alystan kórinedi. Sondaı-aq, nysanǵa joǵary temperatýra men korrozııaǵa tózimdi arnaıy syrlar qoldanylǵan. Taǵy bir ereksheligi — murja betindegi aqaýlar men ózgeristerdi syrttaı baqylaýdy jeńildetedi.
Sonymen qatar, murjanyń aınalasyndaǵy sholý alańdary da syrlandy. Qazir mamandar jańa murjaǵa tehnologııalyq jabdyqtardy kezeń-kezeńimen qosý jáne aýystyrý jumystaryn jalǵastyryp jatyr.
Jańa murjanyń qurylysy ótken jyldyń 5 tamyzynda bastalyp, nebári 73 kún ishinde aıaqtaldy. Sońǵy beton quıylymy 16 qazanda júzege asqan.
Jańa murjanyń bıiktigi — 180 metr. Bul qazirgi qoldanystaǵy № 2 jáne № 3 murjalardan 30 metrge bıik.
Bıyl naýryz aıynda murja astyndaǵy tehnıkalyq bólmeni jabdyqtaý jumystary bastaldy. Іshki betine arnaıy korrozııaǵa qarsy qorǵanys jaǵylyp, 1-den 4-shi qazandyqqa deıingi negizgi gaz ótkizgish joldary jańa murjaǵa qosyldy. Sonymen qatar, qorshaǵan ortaǵa taralatyn zııandy zattardy baqylaýǵa arnalǵan avtomattandyrylǵan júıe ornatylǵan.
Mamandardyń aıtýynsha, nysandy tolyqtaı iske qosý aldaǵy 2025-2026 jylǵy jylytý maýsymynyń basyna josparlanǵan.
Maýsym aıynyń basynda 2-Jylý-elektr ortalyǵynyń qulaǵan murjasynyń ornyna salynǵan № 1 tútin murjasynyń tájirıbelik-óndiristik iske qosylýy sátti ótkenin jazǵan edik.
Esterińizge salaıyq, 2022 jyly 20 naýryz kúni saǵat 19.20-da Petropavldaǵy jylý-elektr ortalyǵynda tútin murjasy jartylaı qulady. Saldarynan jumysshy áıel oqıǵa ornynda mert boldy.
2-JEO jartylaı qulaǵan murjasy buzyp alyndy.
Alaıda jańadan salyna bastaǵan JEO-2 murjasyn qısaıyp ketýine baılanysty qaıta buzýǵa týra keldi.