Petropavl JEO-2-niń jańa tútin murjasy iske qosyldy

PETROPAVL. KAZINFORM — Petropavlda 2-Jylý-elektr ortalyǵynyń qulaǵan murjasynyń ornyna salynǵan jańasy paıdalanýǵa daıyn.

«SEVKAZENERGO» AQ baspasóz qyzmetiniń málimetinshe, búgin JEO-2-de № 1 tútin murjasynyń tájirıbelik-óndiristik iske qosylýy sátti ótti. Bul synaqtyń basty maqsaty — tehnıkalyq sıpattamalardy ólsheý jáne tútin gazdaryn avtomatty túrde baqylaý júıesin baptaý boldy.

— Joba aıasynda jabdyqtardy aýystyryp qosý jáne tańbalaý-boıaý jumystaryn aıaqtaýdy josparlap otyrmyz. Osydan keıin tútin murjasyn tolyq óndiristik paıdalanýǵa engizemiz, — dedi Petropavl JEO-2 dırektory Dmıtrıı Zaharov.

Mamandardyń aıtýynsha, murja dińin betondaý jumysy byltyr 5 tamyzda bastalyp, qurylys rekordtyq merzimde — 73 kún ishinde aıaqtaldy. Murjaǵa qorǵanys qalpaǵy, baspaldaqtar, jaryqtandyrý alańdary, balkondar, syrtqy jaryqtandyrý jáne naızaǵaıdan qorǵaý júıeleri ornatyldy. Murja bıiktigi — 180 metr, bul burynnan bar № 2 jáne № 3 tútin murjalarynan 30 metrge bıik.

Bıyl naýryz aıynda tútin murjasynda jumystar jandanyp, dińiniń ishki betine tottanýǵa qarsy qorǵanys qabaty jaǵylyp, 1-den 4-ke deıingi qazandyq agregattaryna tartylǵan gaz qubyry qosyldy. Sonymen qatar, qorshaǵan ortaǵa taralatyn shyǵaryndylardy baqylaýdyń avtomattandyrylǵan júıesi ornatyldy.

Esterińizge salaıyq, 2022 jyly 20 naýryz kúni saǵat 19.20-da Petropavldaǵy jylý-elektr ortalyǵynda tútin murjasy jartylaı qulady.  Saldarynan jumysshy áıel oqıǵa ornynda mert boldy. 
2-JEO jartylaı qulaǵan murjasy buzyp alyndy.
Alaıda jańadan salyna bastaǵan JEO-2 murjasyn qısaıyp ketýine baılanysty qaıta buzýǵa týra keldi.