Petropavl JEO-2-niń resýrsy eki-úsh jylǵa jetedi – Sátjan Ablalıev

PETROPAVL. QazAqparat – Petropavlda qurylysshylar salaǵa qatysty birqatar máseleni kóterdi. Sonyń biri - 2-Jylý-elektr ortalyǵynyń qýatyna qatysty. Óńirde qurylys qarqyn alǵan, turǵyn úıler men qatar kóptegen áleýmettik nysandar boı kóterip jatyr, dep habarlaıdy QazAqparat tilshisi.

Soltústik Qazaqstan oblysynyń kásipkerler palatasynda qurylys kompanııalarynyń ókilderi oblys ákiminiń orynbasary Sátjan Ablalıevpen kezdesip, salaǵa qatysty máselelerdi kóterdi. Máselen, salynyp jatqan kópqabatty úıler men bolashaqta josparlanǵan nysandarǵa jylý elektr ortalyǵynyń qýaty jetkilikti me?
Qurylys kompanııalarynyń Petropavl 2-JEO jaǵdaıyna alańdaýy kezdeısoq emes. Shynynda da, buryn palata alańynda, qalanyń negizgi jylý elektr ortalyǵynyń qubyry qulaǵanǵa deıin, burynǵy «Sevkazenergo» basshylyǵy stantsııa resýrsynyń shekteýli ekendigi týraly aıtqan bolatyn.
«Osydan úsh jyl buryn osy alańda «Sevkazenergo» AQ burynǵy basshysy Tatarov JEO múmkindigi shekteýli degen boljam jasap – bes jyl merzim berdi, onyń úsh jylyn ótkerdik. Sodan beri qurylys salasynyń damý qarqyny da ózgerdi, qalada jańa shaǵyn aýdandar, áleýmettik nysandar paıda bolyp jatyr. Sondyqtan biz JEO-ǵa qatysty jaǵdaıdy bilgimiz keledi, óńirge gaz qashan keledi nemese stantsııany jańǵyrtý jumystary júrgizile me»,-dep surady «Qazaqstan qurylysshylar odaǵy» SQ fılıalynyń dırektory Shákeı Ámirjan.
Oblys ákimi orynbasarynyń aıtýynsha, stantsııa resýrsy taǵy eki-úsh jylǵa jetedi. Jergilikti atqarýshy organdar qazirgi ýaqytta jylý jáne elektr jelilerine qosylýǵa berilgen tehnıkalyq sharttarǵa túgendeý júrgizýde, sonyń nátıjesinde paıdalanylmaıtyn tehnıkalyq sharttar qaıtarylmaq.
«Bizdiń JEO qýaty - 713 Gkal. Sońǵy jyldary biz shamamen 512-515 Gkal turaqty qoldanamyz. Biz berilgen tehnıkalyq sharttarǵa ınspektsııa júrgizdik. Tehnıkalyq shartty alyp, biraq qurylysty júrgizbegender bar, qajetinen kóp alyp, biraq ony paıdalanbaıtyndar bar. Tekserýden keıin berilgen tehnıkalyq sharttardy azaıtý týraly sóılesemiz. Bul qor bizge qalanyń áleýmettik jáne turǵyn úı nysandarynyń qurylysyn eki-úsh jylǵa qamtamasyz etedi. Aldaǵy aılarda biz bolashaq nysandarǵa tehnıkalyq sharttardy tarata bastaımyz», - dedi oblys ákiminiń orynbasary Sátjan Ablalıev.
Sonymen qatar, ol búgingi kúni salynyp jatqan nemese qurylysty endi ǵana bastaǵan nysandardyń barlyǵynda tehnıkalyq sharttar bar ekenin atap ótti. Qala ákimdigi oblys ortalyǵynyń jylý jelilerin damytý jobasyn ázirlep jatyr, al Petropavl 2-JEO bıyl stantsııanyń negizgi jáne qosymsha jabdyqtaryn jóndeýdi jalǵastyryp, jańa tútin murjasyn salýdy bastady.