Petropavl JEO-2-de zııandy shyǵaryndylar 3,5 esege azaıdy
ASTANA. KAZINFORM – Energetıka mınıstrligi Qazaqstandaǵy kómir elektr stantsııalaryndaǵy zııandy shyǵaryndylardy azaıtý baǵytyndaǵy jumystar jalǵasyp jatqanyn málimdedi.
«SEVKAZENERGO» AQ derekterine sáıkes, Petropavl JEO-2-de lastaýshy zattar shyǵaryndylarynyń deńgeıi belgilengen normatıvterden birneshe ese tómen. Máselen, №1 murja boıynsha kúkirt dıoksıdiniń normatıvi 4194 mg/nm³ bolsa, 2025 jylǵy naqty kórsetkish 1186 mg/nm³ bolǵan.
Mınıstrlik málimetinshe, bul kórsetkishter emıssııa kózderine ornatylǵan avtomattandyrylǵan monıtorıng júıeleri arqyly tirkelgen. Atalǵan júıeler tútin murjalary men sý tógindileri núktelerindegi lastaýshy zattardyń kólemin úzdiksiz baqylap, derekterdi naqty ýaqyt rejıminde tirkep otyrady.
Júıe azot oksıdteri men dıoksıdiniń, kómirtek oksıdiniń, kúkirt dıoksıdiniń jáne shań kólemin baqylaıdy.
– Bul úderiste adam faktory tolyqtaı alynyp tastalǵan, – delingen Energetıka mınıstrliginiń habarlamasynda.
Sonymen qatar vedomstvo kómir generatsııasyn damytýǵa arnalǵan jańa ulttyq jobany iske asyryp jatqanyn málimdedi.
Joba aıasynda «taza kómir» tehnologııalaryn engizý, zamanaýı gaztazartý jabdyqtaryn ornatý jáne zııandy shyǵaryndylardy azaıtý kózdelgen.
Mınıstrlik málimetinshe, ulttyq joba nátıjesinde kómir elektr stantsııalaryndaǵy lastaýshy zattar shyǵaryndylaryn 34%-ǵa qysqartý josparlanyp otyr.
Aıta keteıik, Petropavl JEO-2 Soltústik Qazaqstan óńirindegi negizgi energııa kózderiniń biri sanalady.
Qazaqstan 2030 jylǵa qaraı parnıktik gaz shyǵaryndylaryn 15%-ǵa qysqartýdy kózdeıdi.
