Petropavl jastary ormannan 1 tonnadan astam qoqys shyǵardy
PETROPAVL. QazAqparat – Petropavlda «Taza orman» aktsııasy ótip, oǵan kolledjderdiń 100-den astam stýdenti qatysty. Jastar jarty kúnniń ishinde Meşan ormanynan 1 tonnadan astam qoqys shyǵardy, dep habarlaıdy QazAqparat tilshisi.
«Taza orman» aktsııasy – dástúrli. Uıymdastyrýshylar – SQO tabıǵı resýrstar jáne tabıǵatty paıdalanýdy retteý basqarmasy jáne jastar máslıhaty. Bıyl is-sharany ótkizýge Petropavldaǵy Meşan ormany tańdalyp alyndy. Qalanyń shetinde ornalasqan orman turǵyndardyń kóp baratyn súıikti demalys oryndarynyń biri. Alaıda demalýshylardyń ishinde ózderiniń artynan qoqysty jınap ketpeıtinderi de bar.
Aktsııaǵa Petropavldaǵy kolledjderdiń 129 stýdenti qatysty. Olar 7 komandaǵa bólinip, qoqys jınaýdan jarysqa tústi. Qoldaryna qap alǵan olar iske kirisip, jarty kúnniń ishinde ormannan 1 tonna 273 kg qoqys shyǵardy.
«Ormanshylar kúni-túni ormanda júrip, ózine bekitilgen barlyq aýmaqty nazarda ustaı almaıdy. Óıtkeni 1 ormanshynyń qaramaǵynda 3-3,5 myń ga ormandy alqap bar. Orman órti de, ondaǵy qoqys ta negizinen adam qolymen jasalady. Demalýshylar tabıǵat aıasyna shyǵyp, ózderinen keıin arttarynan jınamaı ketedi. ıAǵnı demalý mádenıeti qalyptaspaǵan. Sondaı-aq aýyl turǵyndary qoqystaryn artyp shyǵyp, polıgonǵa jetpeı jolda ormanǵa aýdaryp ketetinderi bar», - deıdi SQO tabıǵı resýrstar jáne tabıǵatty paıdalanýdy retteý basqarmasynyń bas mamany Qaırolla Baıteńizov.
