Petropavl: Jańa qurylǵan «Jas órken» yqshamaýdanynda 250 oryndyq emhana salynady
PETROPAVL. QazAqparat – Soltústik Qazaqstan oblysynyń densaýlyq saqtaý salasyna byltyr 12,5 mlrd teńge bólinip, kóptegen qymbat jáne zamanaýı qondyrǵylar alyndy, dep habarlaıdy QazAqparat tilshisi.
SQO ákimdiginiń otyrysy ótip, ótken jyl qorytyndylandy.
Óńirdiń densaýlyq saqtaý salasyna byltyr bólingen 12,5 mlrd teńge 2019 jylmen salystyrǵanda 4 ese kóp. Bul aqshaǵa oblystyq aýrýhanada 11 jyl jumys istegen MRT apparaty aýystyryldy, nátıjesinde kezek 4 ese qysqaryp, endi syrqattar 3 aı emes 3 apta kútetin bolǵan. Al mıdaǵy isikti anyqtaý 4%-ke artqan.
Budan basqa 2008 jyly alynǵan eski angıograf aýystyryldy. Bul júrek-qan tamyrlary aýrýlary dıagnostıkasyn jaqsartty.
«Jaqyn kúnderi oblystyq aýrýhanada 3 deńgeıli ınsýlt ortalyǵyn ashamyz. Osyǵan baılanysty taǵy bir angıograf alamyz. Ol bas mıy tamyrlaryna ota jasaýǵa osylaısha mıdaǵy qan aınalymy buzylǵan alǵashqy saǵattarda bolatyn ólim-jitimdi azaıtýǵa múmkindik beredi», - dedi Qumar Aqsaqalov.
Kompıýterlik tomograftardyń sany 4-den 6-ǵa deıin artty. Bul uzyn-sonar kezekti azaıtyp, tynys alý músheleriniń aýrýlaryn der kezinde anyqtaýǵa áser etti.
Onkologııalyq dıspanserge, Aqjar, Jambyl, Tımırıazev jáne Ýálıhanov aýdandarynyń ortalyq aýrýhanalaryna tsıfrlyq mammograftar alyndy.
Byltyr sondaı-aq birer aıdyń ishinde 7 mlrd teńgege 200 oryndyq ınfektsııalyq aýrýhana boı kóterdi. 38 jedel járdem kóligi alynyp, oblys onymen 100 % qamtyldy. Sondaı-aq zamanaýı kóshpeli 8 medıtsınalyq keshen satyp alyndy.
Densaýlyq saqtaý salasyna qarjynyń mol bólinýi keı kórsetkishter boıynsha oń dınamıka berdi. Sonyń ishinde onkologııa boıynsha ólim-jitim 13 %-ke, júrek talmasy boıynsha 10 %-ke, týberkýlez boıynsha 36 %-ke azaıdy.
Bıyl «Bereke» aýdanyndaǵy 250 oryndyq emhananyń qurylysy jalǵasady. Dál osyndaı emhana jańa yqsham aýdan – «Jas órkende» de paıda bolmaq.
