Petropavl zeınetkerleri kompıýterlik klýbqa baryp júr
PETROPAVL. QazAqparat - Soltústik Qazaqstan oblysynyń Býlaevo qalasynda zeınetkerler kompıýter úırenýde. Oqytý kýrstary qarııalar úshin tegin jumys isteıdi, dep habarlaıdy QazAqparat tilshisi.
Maǵjan Jumabaev atyndaǵy aýdanǵa qarasty Býlaevo qalasynda ashylǵan klýb - jastardyń jobasy. 5 adamnan quralǵan bastamashyl top kúzde «Zhas Project» jastar jobasynyń grantyn jeńip alǵan bolatyn. Olar 1 mln teńgege qajetti qondyrǵylar men kompıýterler satyp alǵan. Sondaı-aq arnaıy oqytý baǵdarlamasyn ázirlegen.
«Meniń anam kompıýterdi qalaı paıdalaný kerektigi jaıynda únemi surap otyrady. Oǵan ǵalamtorda jumys isteýdi, áleýmettik jelilerge tirkelýdi kórsettim. Esh qıyndyqsyz úırenip aldy. Osydan keıin nege basqa zeınetkerlerdi kompıýterge úıretetin klýb ashpasqa degen oı keldi. Óz oıymdy dostaryma aıtyp edim, olar birden qoldap áketti», - deıdi bastamashyl toptyń jetekshisi Talǵat Zaǵıparov.
Talǵat Zaǵıparov M.Qozybaev atyndaǵy Soltústik Qazaqstan Memlekettik ýnıversıtetiniń túlegi, aqparattyq tehnologııalar fakýltetinde bilim alǵan. Qazir aýdandyq bilim bóliminde eńbek etedi.
Kompıýterlik klýb aptasyna úsh ret, eki saǵattan jumys isteıdi. Bul jerde zeınetkerler kompıýtermen jumys isteýdiń negizderin bilip qana qoımaı, «elektrondyq úkimet» saıtymen tanysyp, keıbir memlekettik qyzmetterdi osy jerden alýǵa úırenedi. Eki aıdyń ishinde kýrstan 9 zeınetker ótip, jastardy alǵystaryna bólegen. Klýbty uıymdastyrýshylardyń aıtýynsha, kompıýterdi úırenýge tilek bildirýshiler kóp, alaıda, barlyǵyn qamtýǵa jaǵdaı joq. Qańtar aıynyń sońyna deıin taǵy 20 shaqty qarııanyń kompıýterlik saýatyn ashý josparda bar.
