Petropavl vokzalynda satylatyn bılettiń qymbatshylyǵy máselesi óz sheshimin tapty

ASTANA. QazAqparat - Májilismen Káribaı Musyrmannyń Investıtsııalar jáne damý mınıstri Jeńis Qasymbekke joldaǵan depýtattyq saýalyna sáıkes aldymyzdaǵy aqpan aıynan bastap Qyzylorda - Petropavl baǵytynda jańa poıyz qatynasy ashylatyn boldy.

         Búgingi tańda Petropavl qalasynda  "Serpin - 2050" áleýmettik jobasy aıasynda elimizdiń artyq jumys kúshi bar ońtústik oblystarynan kelgen bir myńnan astam jastar bilim alýda. Olar eki óńir arasynda týra qatynaıtyn poıyzdyń bolmaýy saldarynan jol azabyn tartyp júrgen bolatyn. Endi kúnara qatynaıtyn "Qyzylorda - Astana" baǵytyndaǵy №75/76 jolaýshylar poıyzynyń Petropavl qalasyna deıin qatynaý máselesi tolyq sheshilip otyr.

         Petropavl temir joly bólimshesi Reseı Jol qatynastary mınıstrligine qaraıtyny belgili. Osyǵan oraı soltústikqazaqstandyqtar Petropavl temir jol vokzalynda satylatyn bılet baǵasy qymbat ekendigin aıtyp ta shaǵymdanatyn. Bul másele de óz sheshimin tapty.

         - Petropavl temir jolynda poıyzǵa bılet satý máselesi halyqaralyq tarıfter boıynsha júrgiziledi. Biz ony ózgerte almaımyz. Biraq sol jerden biz óz kassalarymyzdy ashtyq. Ózimizdiń poıyzdarymyzǵa bıletterdi óz tarıfterimiz boıynsha sata bastadyq, - deıdi "Qazaqstan temir joly" Ulttyq kompanııasy "Jolaýshylar tasymaly" aktsıonerlik qoǵamynyń bólim basshysy Ábýbákir Smaılov.