Petropavl turǵynynan jarty kelige jýyq sıntetıkalyq esirtki tárkilendi

PETROPAVL. QazAqparat – Petropavl turǵynynan jalpy salmaǵy jarty kelige jýyq «tuz» degen ataýmen belgili sıntetıkalyq esirtki tárkilendi. Jigit ruqsat etilmegen zatty jeke úıdiń aýlasynda saqtap kelgen, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, kúzde soltústikqazaqstandyq polıtseıler sıntetıkalyq esirtki taratty degen kúdikpen Petropavl qalasynyń 32 jastaǵy turǵynyn ustady.

Jeke tintý barysynda odan krıstall tárizdi zat salynǵan «zıplok» paket tárkilendi.

Jaldamaly páterden taǵy eki paket pen temeki shegýge arnalǵan qurylǵy tabylyp, alyndy.

Polıtseıler ustalǵannyń turǵylyqty jerin tekserip, jeke menshik úıdiń aýlasynan asa iri mólsherdegi esirtki salynǵan polımer paket aldy.

Saraptama qorytyndysyna sáıkes ol «tuz» degen atpen belgili α-PvP esirtki zaty bolyp tabylady.

Alynǵan zattyń jalpy salmaǵy - 484,32 gramm, bul asa iri mólsherge jatady. Odan 2 myńnan astam bir rettik qoldanatyn dozany jasaýǵa bolady eken.

«Bul fakti QR QK 297-baby 3-bóligi boıynsha Sotqa deıingi tergep-tekserýlerdiń biryńǵaı tizilimine engizildi. Qazirgi ýaqytta is materıaldary sotqa tapsyryldy. Jyl basynan beri óńir polıtseıleri esirtki satty degen kúdikpen 82 adamdy ustady. Zańsyz aınalymnan 425 kg esirtki alyndy, onyń ishinde 3 kg 429 gr sıntetıkalyq esirtki», - deıdi SQO PD Esirtki qylmysyna qarsy is-qımyl basqarmasynyń bastyǵy Ivan Terzıdı.

Foto: polisia.kz