Petropavl turǵyny ult arazdyǵyn qozdyrǵany úshin sottaldy
Soltústik Qazaqstan oblysy polıtsııa departamenti baspasóz qyzmetiniń málimetinshe, áleýmettik jelige monıtorıng júrgizý barysynda ekstremızmge qarsy is-qımyl basqarmasy qyzmetkerleriniń nazaryn Petropavl turǵyny aýdarǵan. Onyń «Facebook»-ke ornalastyrǵan materıaldarynan, qaldyrǵan jazbalarynan ult arazdyǵyn qozdyrý áreketi baıqalǵan.
Jedel-izdestirý sharasy nátıjesinde oblys ortalyǵynyń 37 jastaǵy turǵyny anyqtaldy. Er adam «Facebook»-ten basqa «Instagram» men «VKontakte» áleýmettik jelilerinde de sol saryndas jazbalar qaldyryp kelgen. Fılologııalyq saraptama ol ornalastyrǵan materıaldardyń ekstremızm sıpatyna ıe ekendigin dáleldedi.
Petropavl qalalyq soty er adamdy kináli dep taýyp, 7 jylǵa bas bostandyǵynan aıyrdy. Sot úkimi zańdy kúshine endi.
«Bıyl, osydan biraz ýaqyt buryn óńirdiń eki turǵyny sottaldy. Olardyń bireýiniń bostandyǵy 3,5 jylǵa, ekinshisiniki 4 jylǵa shekteldi. Sondyqtan, ult arazdyǵyn qozdyrǵandarǵa, ol meıli áleýmettik jeli bolsyn, qatań jaza barlyǵyn eske salamyz. Zań boıynsha iri mólsherde aıyppuldan bastap, 7 jylǵa deıin bas bostandyǵynan aıyrý jazasy kózdelgen. Eger de onyń qylmystyq top quramynda áreket etkeni dáleldense nemese aýyr zardaptarǵa ákelse, jaza da aýyrlap, 20 jylǵa deıin bas bostandyǵynan aıyrylady», - deıdi SQO PD ekstremızmge qarsy is-qımyl basqarmasynyń bastyǵy Rýslan Jarasbaev.