Petropavl turǵyny sportshylarǵa arnap alleıa ashty
PETROPAVL. QazAqparat – Petropavl turǵyny, sport ardageri Baýyrjan Quljanov úıiniń janynan sportshylarǵa arnalǵan alleıa ashsa, endi mýzeı salýdy josparlap otyr, dep habarlaıdy QazAqparat tilshisi.
Petropavldaǵy Borkı kentinde ornalasqan alleıa qala turǵyny Baýyrjan Quljanovtyń úıiniń mańyndaǵy bos jatqan jerde paıda boldy.
Bir kezderi aram shóp basqan aýmaq 2-3 jyldyń ishinde retke keltirildi. Qaz-qatar tizilgen eskertkishter – negizinen Qazaqstannyń sportshylaryna, el sportyn damytýǵa úles qosqan jandarǵa arnalǵan.
Sondaı-aq, Baýyrjan Nııazuly ózi syılaıtyn azamattarǵa da alleıadan oryn beripti.
«Usynystar tústi, dámhana, meıramhana ash degen osy jerde. Biraq oılana kele sportshylardyń qurmetine alleıa-mýzeı salýdy uıǵardym. Óıtkeni, myna dál qasymyzda sport kesheni bar. Mynaý eskertkish Dýshan Lıhardýs – Slovakııa ultynyń uly, meniń qudam, sportty jaqsy kórgen, óz elinde qolynan kelgenshe sportshylarǵa qoldaý bildirdi. Vladımır Mezev – meniń jan joldasym, ol velosporttan sport sheberi, Boranbaı Balseıitov – dosym, Petropavlda kezinde boks zalyn ashqan, ol áli kúnge istep tur. ıÝrıı Ýsoltsev – «Bylǵary dop», «Altyn shaıba» týrnırlerine, «Aq bıdaı» sport merekesine únemi demeýshilik jasaıtyn. Al mynaý Vıktor Jılıaev degen azamat, ol ekeýimiz sekseninshi jyldary alǵash ret «Aq bıdaı» sport oıynynyń negizin qalap, olımpıada aldynda ótkizdik. Sodan beri 40 jyldan astam ýaqyt sport merekesi óńirde toqtaýsyz ótip keledi», - deıdi Baýyrjan Quljanov.
Sport alleıasynda Shámil Serikovke, Máskeýde 1980 jyly ótken olımpıadada klassıkalyq kúresten altyn alǵan balýanǵa da músin qoıylǵan.
«Shámil Serikov jaıynda kóp aıtyla bermeıdi, oǵan elimizde eskertkish te qoıylmaǵan. Ol kúrestiń danyshpany edi. 1982 jyly chempıon bizdiń oblysqa keldi, qarsy aldyq. Shámil óńirge kelgen alǵashqy olımpıada chempıony, ókinishke qaraı ómirden erte, 33 jasynda ketti», - deıdi sport ardageri.
Alleıada kúsh atasy Qajymuqannyń eskertkishi, Ivan Poddýbnyıdyń músini, onyń qasynda boks mektebinen tabylǵan kóne shtanga oryn tepken. Mundaı shtangamen tsırkterde óner kórsetken eken.
«Qajymuqan Petropavlǵa kelgen, tsırkte óner kórsetken. Osy Borkı kentinde ol kelgen kezde turǵan úı áli kúnge deıin saqtalǵan. Qajymuqannyń músinin maǵan buryn men basqarǵan «Dınamo» sport qoǵamynyń 90 jyldyǵyna oraı SQO polıtsııa departamentiniń burynǵy bastyǵy Berik Bilálov syılady. Jalpy bul jerdegi músinderdiń basym bóligi bizdiń óńirde jazasyn ótegen sottalýshylardyń qolynan shyqqan. Al sońǵylaryn jergilikti músinshi Svetlana Brıýsova tapsyryspen jasady», - deıdi Baýyrjan Quljanov.
Sport alleıasynda paıda bolǵan sońǵy músinderdiń biri – olımpıada chempıony Jaqsylyq Úshkempirovtiki. Túkpirde Baýyrjan Momyshulyna arnalǵan músin tur. Sport ardageri Keńes Odaǵynyń Batyryn pir tutady. Al onyń qasynda Chapaevqa arnalǵan músindi kórýge bolady. Onyń da bul alleıadan oryn tebýiniń óz oqıǵasy bar.
«Meniń sportqa kelýime, kúresti meńgerýime osy Chapaev birden-bir sebep. Bala kezimizde keshke jumys bitkesin bárimiz klýbqa jınalamyz. Kóretinimiz kúnde bir kıno – Chapaev týraly. Balalar sol Chapaev sııaqty qaharman, kúshti bolǵymyz keledi. Qol bosaǵanda eresekter bizdi ortaǵa shyǵaryp kúrestiredi, jeńgenimiz, árıne, Chapaev bolamyz, jeńimpaz sol kezdegi aýyldaǵy jalǵyz mashınaǵa minýge ruqsat alady. Sondyqtan barymyzdy salamyz», - deıdi Baýyrjan Nııazuly balalyq shaqty eske alyp.
Sport alleıasy shyrsha-qaraǵaımen kómkerilgen. Alaıda munda áli de atqarar jumys barshylyq. Sport ardageri kireberiske olımpıada nyshany – bes saqınany ornatpaq.
Al ortasynda bos jatqan aýmaqqa sport mýzeıine arnalǵan ǵımaratty salmaqshy. Oǵan qajetti jádiger Baýyrjan Quljanovta jeterlik.
Úıiniń birneshe bólmesin arnaýǵa týra kelipti.
«Kollektsııany bastapqyda ózim jınadym, keıin meniń osyndaı áýestigim bar ekenin bilip, dostarym syılaıtyn boldy. Mynaý meniń ózim jeńip alǵan júldeler. Bul jerde túrli músinsheler, fotosýretter, jýrnaldar, sport tarıhynan syr shertetin jádigerler bar. Men delegatsııa quramynda jeti olımpıadaǵa barǵan adammyn. Ol jerden ákelgen kádesyılar bar. Munyń bárin jurt kórse eken deımin. Sol sebepti sportshylarǵa arnalǵan alleıaǵa mýzeı salýdy josparladym. Eki jyldan keıin 70 jasqa tolamyn. Osy mereıtoıǵa jasaǵan syıym bolady, soǵan deıin Alla kúsh-qýat berse - bitiremin», - deıdi Baýyrjan Quljanov.
Baýyrjan Nııazuly Petropavl qalasynyń Qurmetti azamaty, keden qyzmetiniń qurmetti qyzmetkeri, Qazaqstan Respýblıkasynyń sport qaıratkeri. QR qazaq kúresinen birneshe dúrkin chempıony, «Qajymuqan» syılyǵynyń SQO-daǵy jalǵyz ıegeri.
