Petropavl turǵyny polıtsııaǵa óte kóne qarý tapsyrdy
PETROPAVL. QazAqparat - Petropavl qalasynyń turǵyny jer telimin satyp alyp, ol jerden eki ańshy myltyǵy men tapansha salynǵan qap taýyp aldy, dep habarlaıdy QazAqparat.
Oblystyq Polıtsııa departamentiniń málimetinshe, ańshy myltyqtary osy zamandaǵy kádimgi qosaýyzdar. Al tapansha 1930 jyly shyqqan «Nagan» ataýymen belgili kóne qarý ekeni anyqtaldy. Ony mamandar saralap, 3-shi dárejeli jáne qoldanýǵa jaramsyz degen baǵa berdi. Ol qarýdy tapsyrǵan adamǵa 30 300 teńge tólenedi. Barlyq tapsyrylǵan qarýlar úshin 130 myń teńge tólenýi múmkin.
«3 aptaǵa jetpeıtin ýaqytta qarý satyp alýǵa bıýdjetten bólingen qarajat ıgerildi. 80 qarý tapsyryldy, tólenýi tıis qarjy kólemi 4,5 mln teńge»,-dedi baspasóz qyzmetindegiler.
Soltústikqazaqstandyqtar tapsyrǵan qarýlardyń basym bóligin tegis uńǵyly, ıir oıyqty qarýlar qurap otyr. Dárejesine qaraı olarǵa 22 725, 53 025 nemese 75 750 teńge tólenedi.
«Aktsııanyń maqsaty - buryn qarý-jaraǵy bar jáne ony osy ýaqytqa deıin saqtap kelgen adamdar ony resmı organdarǵa óz erkimen ótkizse, jaýapkershilikten qutylady. Alaıda, onyń qandaı da bir qylmysqa qatysy bolmaýy kerek. Eger tapsyrylǵan qarý qylmystyq maqsatta qoldanylmaǵan bolsa, polıtsııa ony ıesiniń qaıdan alǵanyna mán bermeıdi», -deıdi ákimshilik polıtsııa basqarmasynyń bastyǵy Jasulan Ospanov.
