Petropavl turǵyny polıtsııaǵa bir jarym ǵasyrlyq tarıhy bar revolver tapsyrdy
PETROPAVL. QazAqparat - Petropavl qalasynyń turǵyny polıtsııaǵa 1865 jyly shyǵarylǵan kóne revolverdi tapsyrdy, dep habarlaıdy QazAqparat tilshisi.
Soltústik Qazaqstan oblystyq Polıtsııa departamentiniń baspasóz qyzmetiniń habarlaýynsha, oblys ortalyǵynyń turǵyny qalalyq polıtsııa basqarmasyna revolver tapsyrdy.
Jedel-krımınalıstıkalyq bólinis qyzmetkerleri anyqtaǵandaı, qarý 1865 jyly jasap shyǵarylǵan Webley №2 «Býldog» markaly revolveri bolyp shyqty.
Er adamnyń aıtýynsha, erekshe oljany ol qala mańyndaǵy Meşan ormanynan taýyp alǵan. Qarý atýǵa jaramsyz dep tanyldy. Petropavldyqqa 30 myń teńgege jaqyn ótemaqy tólenetin bolady. Taǵy bir kóne 1895 jyly shyǵarylǵan revolver «nagandy» oblys turǵyny sáýir aıynyń sońynda tapsyrdy. Al negizinen soltústikqazaqstandyqtar myltyq tapsyrady eken.
«Esterińizge sala keteıik, tirkelmegen qarý úshin ákimshilik qana emes, qylmystyq jaýapkershilik te qarastyrylǵan. Biraq qarýdy óz erkimen ákelip tapsyrǵan azamattar jaýapkershilikten bosatylady. Jaqynda oblys aýmaǵynda «Jolda qabyldaý» aktsııasyn ótkizdik. Onyń barysynda ishki ister organdarymen kórsetiletin memlekettik qyzmetter týraly suraqtar jıi qoıyldy. Solardyń biri - qarýdy tirkeý.
Presnovka selosynyń turǵyny aktsııa kezinde qarýdy týysynyń atyna qaıta tirkeýge qatysty saýalyna jaýap aldy. Sondaı-aq, soltústikqazaqstandyqtardy jaraqat salatyn qarýdy ustaýǵa ruqsat alý týraly suraqtary da qyzyqtyrdy», - deıdi SQO PD Ákimshilik polıtsııa basqarmasynyń bastyǵy Jasulan Ospanov.
Tártip saqshylary túsindirgendeı, zańnama boıynsha mundaı qarý túrin tirkeý jáne qoldaný boıynsha ruqsat tek zańdy tulǵalarǵa ǵana beriledi.
Tirkelmegen qarýdy turǵyndardan satyp alý boıynsha bastalǵan aktsııa barysynda petropavldyqtar 27 qarý tapsyrsa, sonyń ishinde tarıhı qundylyqqa ıe rarıtetter de bar eken.
