Petropavl turǵyny polıtseıge judyryq jumsaǵan
PETROPAVL. QazAqparat – Petropavlda mas er adam polıtseılerge qarsylyq bildirip, judyryq jumsady, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, 16 mamyr keshki ýaqytta «102» arnasyna Gorkıı kóshesindegi úıdiń aýlasyndaǵy balalar alańynda mas er adamnyń júrgeni týraly habarlama kelip túsken. Shaqyrýǵa jaqyn mańdaǵy avtopatrýl men Ulttyq ulan áskerı qyzmetshileriniń jaıaý narıady barǵan. Polıtseıler kelgen kezde quqyq buzýshy qarsylyq kórsetti. Dóreki sózder aıtyp, tártip saqshylarynyń bireýine judyryq ala umtyldy. Polıtseılerge oǵan kisen salýlaryna týra kelgen.
Tekseris barysynda onyń Petropavldyń 38 jastaǵy turǵyny ekeni anyqtaldy. Quqyq buzýshy buryn buzaqylyq jasaǵany, sýyq qarýdy zańsyz saqtaǵany jáne bılik ókilin qorlaǵany úshin sottalǵan eken. Medıtsınalyq kýálandyrý masańdyq deńgeıin kórsetti.
Er adamǵa qatysty QR ákimshilik quqyq buzýshylyq týraly kodeksiniń 440-baby «Alkogoldik ishimdikterdi ishý nemese qoǵamdyq oryndarǵa masań kúıde kelý» boıynsha materıal jınalyp, sotqa joldandy.
«Budan bólek, QR Qylmystyq kodeksiniń 380-baby «Bılik ókiline qatysty kúsh qoldaný» boıynsha materıal jınaldy. Saraptama taǵaıyndaldy, onyń nátıjesi boıynsha protsessýaldyq sheshim qabyldanady. Bul bap boıynsha 3 myń AEK deıingi mólsherde aıyppul nemese 3 jyl merzimge bas bostandyǵynan aıyrý jazasy kózdelgen», - deıdi Petropavl qalalyq polıtsııa basqarmasynyń bastyǵy Jandos Muqatov.
