Petropavl turǵyny múgedekter men qarttarǵa arnap, velokat jasap shyǵardy
PETROPAVL. QazAqparat – Petropavl turǵyny Valentın Bondarev júrip-turýy qıyn jandarǵa arnalǵan velokat jasap shyqty. Qarııa óner tabysyn patenttep, endi ony qoldanysqa engizýge ınvestorlar tapqysy keledi, dep habarlaıdy «QazAqparat» HAA tilshisi.
Velokat dep atalatyn óner tabysynyń velosıpedten ereksheligi – onyń shynjyry men tepkishi joq. Otyrǵan adam ony aıaǵymen jerge ıterilip qozǵaıdy. Velokat úsh dońǵalaqtan turady, artynda shaǵyn baspaldaǵy bar. Adam samokat sekildi turyp ta, otyryp ta tebe alady.
«Kóshede tórt dońǵalaqty mashınada otyrǵan balany kórdim. Bala ony aıaǵymen ıterilip júrgizdi. Muny kórgennen keıin nege eresekterge osyǵan uqsas qurylym jasap shyqpasqa degen oı keldi. Osylaısha velokat paıda boldy», - deıdi qala turǵyny Valentın Bondarev.
Valentın Bondarev eń alǵashqy velokatty 2018 jyly jasaıdy. Syzbasyn syzyp, qajetti materıaldardy jınap, qurastyrýǵa jarty jylǵa jýyq ýaqytyn jumsaǵan.
«Velokat densaýlyǵy nashar zeınet jasyndaǵy adamdarǵa, omyrtqasy zaqymdanyp, ózdiginen júre almaıtyndarǵa, aıaqtary aýyratyndarǵa, sondaı-aq júrek aýrýlary bar jandarǵa arnalǵan. Artyq salmaǵy bar adamdar da qoldana alady. Trenajer retinde de qoldanýǵa bolady. Jol tańdamaıdy. Úıde de, dalada da paıdalaný múmkindigi bar. Bul velosıpedter sekildi tek alǵa ǵana emes, artqa da júredi», - deıdi qala turǵyny.
Ónertapqyshtyń jasy búginde seksende. Valentın Bondarev 30 jyldan artyq jergilikti joǵary oqý ornynda, kólik jáne mashınajasaý kafedrasynda eńbek etti. Tehnıka ǵylymdarynyń kandıdaty. Óner tabystary úshin buǵan deıin 5 patent alǵan.
«Temir dánekerleıtin ottyq úshin eki patent jáne velosıpedti jetildirip, oǵan úsh patent aldym. Velokatqa patent alý úshin bir jyl júrdim. Velokatty, meniń esebim boıynsha, jasap shyǵýǵa 18 myń teńge kerek. Bul kóp aqsha emes, zeınetkerlerge qoljetimdi bolar edi. Petropavl aýyr mashına jasaý zaýyty kezinde velosıped shyǵardy. Osy kásiporyn qolǵa alsa, óndiristi jolǵa qoısa degen tilegim bar», - deıdi ónertapqysh.
